Italiýanyň paýtagty Rimde ýerleşýän taryhy Kolizeý amfiteatry abatlanyp, onuň içinde ýerzemin gat gurlar. Ýurduň Medeniýet ministrligi bina abatlanandan soňra onuň ilkibaşdaky durkuna eýe boljakdygyny mälim etdi. 18,8 million ýewro bölünip berlen taslamanyň 2023-nji ýylda tamamlanmagyna garaşylýar. Şeýlelikde, amfiteatryň myhmanlary onuň irki döwürlerdäki ýagdaýyny görüp bilerler.
Medeniýet ministri Dario Françeskininiň aýtmagyna görä, binanyň aşagyna agaçdan ýene bir gat gurlar.Açylyp-ýapylýan bu gat Milan Ingegneria inženerçilik kompaniýasy tarapyndan gurlar.Abatlaýyş işleri geçirilenden soňra bu ýerde dürli çäreleriň guraljakdygy habar berildi.
Arheologlar XIX asyrda geçirilen abatlaýyş işlerinde dünýäniň ýedi täsinliginiň biri hasaplanýan 2 müň ýyldan gowrak taryhy bolan Kolizeýiň ýerzemin gatyny aýrypdyrlar. Şonda binanyň aşagyndaky ýerasty geçelgeler ýüze çykarylypdy. Kompaniýanyň wekilleri täze guruljak açylyp-ýapylýan gatyň tebigy yşygyň we howanyň ýerasty geçelgelere girmegini üpjün etjekdigini mälim etdi.
Rim imperiýasynyň iň uly amfiteatrlarynyň biri bolan Kolizeýde geçirilen çärelere 50 müňden gowrak adam tomaşa edýän eken. 2019-njy ýylda Kolizeýe 7,6 million syýahatçy barypdyr.
Döwlet Gurbanow,
Magtymguly adyndaky Türkmen döwlet
uniwersitetiniň talyby.
The post Kolizeý abatlanar appeared first on Zaman Türkmenistan.