Aşgabadyň Köpetdag topary Türkmenistanyň futbol çempionatynyň nobatdaky möwsüminiň öňüsyrasy tejribeli oýunçylaryň üçüsini düzümine goşdy.
TFF-niň resmi web saýtynda habar berlişi ýaly, Türkmenistanyň futbol çempionatynyň geçen möwsüminde Altyn asyr topary bilen ýurduň futbol çempionatynyň ýeňijisi bolan Şamämmet Hydyrow, geçen möwsüm Aşgabatda kärendesinde çykyş eden Ahalyň oýunçysy Şazada Bäşimow hem-de geçen möwsümi Energetik futbol toparynyň düzüminde kärendesinde geçiren Muhammet Işangulyýew hünär ýollaryny Aşgabadyň Köpetdag toparynda dowam ederler.
Mundan başga-da Köpetdag futbol topary ýaş oýunçylaryň hem birnäçesini düzümine geçirdi.
Belläp geçsek, Aşgabadyň Köpetdag topary Türkmenistanyň futbol çempionatynyň geçen möwsüminde geçiren 14 duşuşygynda 21 utuk toplap, ýaryş tertibini dördünji hatarda tamamlamagy başardy.