Los-Anjeles Leýkersiň öňki oýunçysy Kobi Braýant aradan çykandan soň, Jeýms Neýsmit adyndaky Basketboluň şöhrat zalyna girizildi. Resmi dabara Ankaswillda (Konnektikut ştaty, ABŞ) geçirildi diýip, TASS habar berýär.
Braýantdan başga-da, Şöhrat zalyna Milli basketbol assosiasiýasynyň (MBA) çempionlary Tim Dankan we Kewin Garnett, MBA-nyň zenan çempiony, olimpiýa çempiony Tamika Ketçings, tälimçiler Rudi Tomýanowiç, Kim Malki, Barbara Stiwens, Eddi Satton, menejer Patrik Bauman girizildi. Şöhrat zalyna girizilenleriň atlary 2020-nji ýylyň aprel aýynda yglan edildi.
Dabara awgust aýynda geçirilmelidi, ýöne pandemiýa sebäpli ol yza süýşürildi. 2020-nji ýylyň 26-njy ýanwarynda bortunda 41 ýaşly Braýant bolan hususy dikuçar Los-Anjelesiň golaýynda heläkçilige uçrady.Uçarman we sekiz ýolagçynyň ählisi ýogaldy, olaryň arasynda Braýantyň 13 ýaşly gyzy Jianna hem bardy.
Braýant karýerasyny 2016-njy ýylda tamamlady.Ol “Los-Anjeles Leýkersiň” düzüminde bäş gezek MBA-nyň çempiony boldy.Bu topar üçin ol 20 möwsüme gatnaşdy. 2008-nji ýylda yzygiderli çempionatyň iň gymmatly oýunçysy, 2009 we 2010-njy ýyllarda MBA-nyň finalynda iň gymmatly oýunçy boldy.
ABŞ-nyň ýygyndy toparynyň düzüminde Braýant iki gezek Olimpiýa oýunlarynda ýeňiji boldy (2008, 2012).Ol MBA-nyň taryhynda iň netijeli oýunçylaryň sanawynda dördünji orny eýeleýär (33 643 utuk).
Braýant MBA-nyň “ýyldyzlarynyň” oýnuna 18 gezek gatnaşdy.