Mertebe
2012-nji ýylyň dekabrynda Ispaniýada uly baýrakly ýaryş geçirilip, oňa ezber türgenler gatnaşypdyr. Şonda pellehanada gyzykly waka bolup geçipdir. Keniýaly Abel Mutai Londanda geçirilen Olimpiada oýunlarynda bürünç medal alan türgenleriň biri bolup, päsgelçilikli 3 müň metr ylgawda beýlekilerden has öňe saýlanypdyr. Ýöne ol pellehana 10 metr galanda badyny gowşadypdyr.
Abel Mutai pellehananyň çyzygyndan geçendirin öýdüp, tomaşaçylara elini galdyryp mübärekläpdir.Olar bolsa, öz nobatynda ispançalap oňa pellehana az galandygyny aýtmaga dyrjaşypdyrlar.Ikinji bolup pellehana golaýlan ispaniýaly Iwan Fernandes Anaýýa keniýalynyň bu ýalňyşlygyndan peýdalanyp, birinji orny eýeläp biljek eken. Ýöne ol muňa derek pellehananyň çyzygyny görkezip, Abeliň ýagyrnysyndan çalaja itipdir… Ylgaw ýaryşyndan soňra Iwan altyn medal almakdan, öz mertebesini saklamagyň has möhümdigini aýdypdyr.
Arzuw
Uçarmanlaryň biri baýyrlaryň arasynda ýerleşýän obasynyň üstünden uçarda barýarka, kärdeşine bakyp şeýle diýipdir:
Obaň golaýyndaky tokaýyň içinden akyp geçýän derýanyň gözelligine bir seretsene.Men şol derýany alkymlap oturan obada önüp-ösdüm.Ol ýer meniň dogduk depäm. Çagalygymyzyň alabaharynda dostlarymyz bilen şol derýada suwa düşerdik, balyk tutardyk. Şol döwürler balyk tutmak meniň iň gowy görýän güýmenjämdi. Şol ýyllarda üstümizdäki mawy asmandan uçarlar uçup geçýärdi. Şonda men uçarman bolmagy arzuw edýärdim.
Häzir meniň arzuwlarym hasyl boldy.Indi her gezek obamyň golaýyndaky tokaýdan akyp geçýän derýanyň üstünden uçup geçenimde, pensiýa çykanymdan soň, ýene-de şol günlere dolanyp, balyk tutmaga gitmegi arzuw edýärin.
Algyr
Bir gezek derýanyň kenaryndaky gaýalarda ýaşaýan algyra uly balygy awlamak başardypdyr. Muny gören gargalaryň ýüzlerçesi içiňden geçip barýan gagyldylary bilen algyryň yzyndan eňipdirler. Algyr görgüli haýsy tarapa ýönelse, gargalar hem onuň yzyndan galmandyr.
Ahyrsoňy kowgudan ýadan guş penjesini açyp, awuny aşak taşlapdyr. Şobada gargalar onuň yzyna düşmeklerini bes edip, ýere gaçan balyga topulypdyrlar.
Kowgudan halys bolan ýaňky algyr demini dürsemek üçin gaýanyň kertine gonupdyr. Ol bu rahatlykdan lezzet alyp, öz ýanyndan şeýle diýipdir: Bu balyk meniň bar rahatlygymy bozdy. Ony taşladymam welin, derrew meni öz günüme goýdular…
Ynsan haýsy-da bolsa, bir gymmatlygy elinde saklaýarka, aladaly durmuşda ýaşamaga mejbur bolýar. Haçan-da, adam özüni ynjalyksyz edýän isleglerinden el çekende, kalby aram tapyp, rahatlyga gowuşýar.
Rus dilinden terjime eden
Rahman Kömekow, Ýagşygeldi Kakaýew adyndaky Halkara nebit we gaz uniwersitetiniň talyby.