Dünýä Kubogyna gatnaşýan 831 futbolçynyň arasynda bir maşgalanyň agzalary, ýagny dogan futbolçylar hem bar. Bu çempionatda futbolçy doganlaryň 5 jübüti hasaby alyndy. Şol 5 jübütiň 4-si bir milli toparda çykyş edýär. Galan biriniň bolsa, milli toparlary başgaça.
Belgiýanyň düzüminde doganlar Hazarlar bolup, olaryň ulusy Edin 10-njy, kiçisi Torgan 21-nji belgide oýnaýar.Iki futbolçy-da milli ýygyndynyň iň esasy hüjüm güýji hasaplanýar. 1-nji duşuşykda ýygyndynyň kapitany Edin çykyş eden bolsa, agasyndan 2 ýaş kiçi Torgan ätiýaçda oturdy.
Marokkonyň ýygyndysyna garşy geçirilen duşuşykda bolsa olaryň ikisi hem esasy düzümde meýdança çykdy.Horwatiýa bilen bolan oýunda 2 dogan hem oýna soň goşuldy.
Fransiýanyň düzüminde-de iki goragçy dogan bolup, 1 ýaş aratapawutly doganlar Hernandesler toparyň esasy oýunçylary hasaplanýar.Luka bilen Teo Hernandesleriň ikisi-de çep gyrada oýnap, ulusy Luka wagtal-wagtal merkezi goragda hem çykyş edýär.
Teo bolsa diňe çep goragda däl-de, kämahal çep ganatda hem çykyş edýär.Luka 21-nji, Teo 22-nji belgili köýnekçäni geýýär.Fransiýanyň ýygyndysynyň ilkinji duşuşygynda, ýagny Awstraliýa bilen geçirilen oýunda Hernandesleriň ulusy Luka agyr şikes aldy.
Operasiýa bolan Lukanyň diňe bir Dünýä Kubogynda-da däl, möwsümiň galanynda hem meýdança çykyp bilmejekdigi habar berildi. Şol duşuşykda agasynyň ornuna Teo meýdança girip, ol bir goluň pasyny hem berdi.
Gananyň milli ýygyndysynda-da Afrika futbolynyň ägirtlerinden Abedi Peleniň ogullary Jordan bilen Andre Aýewler milli toparyň iň esasy ýyldyzlarydyr.Ulusy Jordan toparyň kapitany bolup, ol 10-njy belgide oýnaýar. 1-nji duşuşykda Jordan Aýew gol hem geçirdi.
Günorta Koreýa bilen geçirilen duşuşykda aratapawudy 2 ýaş bolan doganlaryň ikisi hem esasy düzümde meýdança çykdy.Olar 3-nji duşuşykda bile çykyş etdiler.
Serbiýanyň düzüminde Milinkowiç-Sawiçler maşgalasynyň 2 wekili Sergeý bilen inisi Wanýa çykyş edýär. Iki futbolçy-da Italiýanyň çempionatynda degişlilikde, “Lasio” we “Torino” klublarynda oýnap, ulusy Sergeý uly meşhurlyga eýedir. 20-nji belgide çykyş edýän Sergeý ýarymgoragçy bolsa, 2 ýaş kiçi inisi, 25 ýaşly Wanýa derwezäni goraýar.
5-nji dogan jübütimiz bolsa Iniaki bilen Niko Williamslar bolup, olaryň hersi başga bir ýygyndyda çykyş edýär. 2010-njy ýylda-da Boateng doganlaryň kiçisi Žerom Germaniýanyň, ulusy Kewin Prins Gananyň ýygyndysynda oýnapdy we olaryň ikisi bir duşuşykda garşydaş hem bolupdy.
La Liganyň özboluşly kluby “Atletik Bilbaoda” çykyş edýän Williams doganlaryň ulusy, 28 ýaşyndaky Iniaki Gananyň milli ýygyndysyny saýlady. 21 ýaşyndaky inisi Niko bolsa, Ispaniýanyň düzüminde oýnaýar.Iki oýunçy-da hüjümde oýnap, Iniaki Gananyň düzüminde 19-njy, Niko Ispaniýanyň ýygndysynda 12-nji belgili köýnekçäni geýýär.
Iniaki Gananyň geçiren 3 duşuşygynda-da esasy düzümde meýdança çyksa-da, oňa tapawutlanmak başartmady.