Formula 1 boýunça möwsümiň 13-nji ýaryşy Wengriýanyň Madiorod şäherindäki belli Hungaroring trassasynda geçirildi. 70 aýlawdan ybarat bolan ýaryşda McLaren toparynyň awstraliýaly sürüjisi Oskar Piastri ýeňiş gazandy. Pellehana 1 sagat 38 minut 01,989 sekuntda tamamlady. Bu onuň karýerasyndaky ilkinji ýeňşi bolup, 23 ýaşyndaky pilot bu birinjilik üçin 35 ýaryş garaşmaly boldy.
Ýaryşda 2-nji ýeri Piastriniň britaniýaly topardaşy Lando Norris eýeledi.Ol 1-nji bolup bat alan ýaryşynda topardaşyndan 2,141 sekunt yza galdy. 3-nji orna başga bir britaniýaly sürüji, Mercedes toparynyň weteran piloty Lýuwis Hamilton mynasyp boldy.
Ferrari toparynyň sürüjileri 4-nji hem-de 6-njy orny eýeläp, monakoly Şarl Lekler bilen ispaniýaly Karlos Saýns Junioryň arasyna Red Bull toparynyň niderland piloty Maks Werstappen girdi.Maks Werstappen soňky 3 möwsümiň dowamynda ilkinji gezek yzly-yzyna 3 ýaryşda ýeňiş gazanyp bilmedi.
Oňa şu möwsümde 13 ýaryşyň 6-synda ýeňiş gazanmak başartmady.
Wengriýa Gran Prisinden soň sürüjileriň sanawynda üýtgän zat bolmady. Sanawyň lideri Maks Werstappen ornuny goramagyny dowam edýär. Onuň 265 utugy bar. 2-nji ýerdäki Lando Norris 189, 3-nji orundaky Şarl Lekler 162 utuk toplady. Karlos Saýns Junior 154, Oskar Piastri 149 utuk bilen 4-5-nji orunlary eýelýärler.
Möwsümiň 14-nji ýaryşy 28-nji iýunda Belgiýada geçiriler. Şol Gran Priden soň F1-iň bäsleşiklerine 1 aý töweregi arakesme berler.