Dünýä futbolyna ençeme ýyldyzy peşgeş beren Braziliýanyň meşhur futbolçylaryndan Kaka Leite şu gün 40 ýaşyny doldurdy.
Doly ady Rikardo Izakson dos Santos Leite bolan futbolçy 1982-nji ýylyň 22-nji aprelinde Federal welaýatynyň Gama diýen ýerinde dünýä inýär.Kakanyň maşgalasynyň maliýe ýagdaýy beýleki brazil futbolçylarynyňka garanyňda ganymat bolup, onuň hem okuwyna hem-de futbola gurpy ýetipdir. 1994-nji ýylda “Sao Paulo” toparynyň çagalar/ýaşlar düzümine goşulýar.
Ol 2000-nji ýyla çenli şol düzümde çykyş edýär. 2001-nji ýylda şol klubda professionallyga ädim äden Kaka birinji möwsüminde 27 oýunda 12 gol geçirýär. “Sao Paulo” toparynda ýene-de 2 möwsüm özüni görkezen Kakanyň bu başarnygy Ýewropa klublarynyň nazaryndan sypmaýar.
Kaka brazil klubunda 125 oýunda 47 gezek tapawutlanýar.
2003-nji ýylyň tomsunda Italiýanyň “Milan” kluby Kakany 8,5 million ýewro transfer edýär.Ine, şondan soň Kakanyň başdan geçirmesi başlaýar.Ol “Milanda” 6 möwsüm çykyş edýär. “Serie A”-da 193 oýunda 70, umumylykda-da 270 duşuşykda 95 gol geçirýär.
Ol “Milan” bilen “Serie A”-da, Çempionlar Ligasynda çempionlyk gazanýar. Şol sanda, Italiýanyň, UEFA-nyň Super Kuboklaryny, FIFA Klublar arasy Kubogyny asmana göterýär.Ol “Milandaka” 2007-nji ýylda “Altyn top” baýragyny hem gazanýar.
2009-njy ýylyň tomsunda Kakany “Real Madrid” şol wagtlar üçin rekord baha 68,5 million ýewro töläp düzümine goşýar.Kakanyň “Realdaky” başdan geçirmesi “Milandaky” ýaly şowly bolmaýar.
Mahal-mahal şowly çykyşlar görkezse-de, dürli sebäplerden esasan hem agyr şikesler zerarly “Milandaky” başarnygyna ýetmek oňa başartmaýar.Ol “Realda” 120 oýunda 29 gezek tapawutlanýar.Kaka “La Ligada” çempionlyk gazanýar.
2013-nji ýylda “Milana” dolanyp, köne klubunda bir möwsüm çykyş edýär (37 oýun 9 gol).Tomusda ýarym möwsümlik has köne klubuna “Sao Paulo” toparyna, ýagny watanyna dolanýar (24 oýun 3 gol).
Kakanyň nobatdaky duralgasy ABŞ bolup, ol MLS-iň täze toparlaryndan “Orlando Siti” bilen şertnama baglaşýar.Braziliýaly futbolçy bu klubda-da 3 möwsümde 78 gezek meýdança çykýar.Ol şolarda 25 pökgini derwezä girizýär.
Kaka Braziliýanyň milli ýygyndysynda 92 oýun geçirýär. Ýyldyz futbolçy şol duşuşyklarda 29 gezek tapawutlanýar. Kaka Leite 2002-nji ýylda Braziliýanyň ýygyndysynyň düzüminde bolup, ol sambaçylar bilen Dünýä Kubogyny gazanýar. Kaka şol çempionatda bary-ýogy 25 minut meýdança çykýar.
Kaka Leite futbolyň iň 3 baýragy milli ýygyndylar üçin Dünýä Kubogy, klublar üçin Çempionlar Ligasy hem-de futbolçylaryň şahsy üçin “Altyn top” baýraklaryny gazanan 8 futbolçynyň biridir.
Kaka bir döwürler 2008-2017-nji ýyllara aralygynda “Altyn top” baýragyny gezekleşip alan Messi we Ronaldodan öň arzyly baýragy gazanan soňky futbolçy hökmünde-de tanalýardy. 2017-nji ýylyň 17-nji dekabrynda-da 17 ýyllyk professional karýerasyny tamamlandygyny mälim edýär.
Kaka Leiteniň maşgala durmuşy barada aýdylanda, ol şady-horramlykdan, goh galmagaldan, paparazzi durmuşyndan uzakda ýaşamagy halaýar.Kaka 2005-nji ýylda özüniň çagalykdan bäri söýgülisi Karolina Seliko bilen durmuş gurýar.
Olaryň 2 çagasy ogly Luka, gyzy Izabella dünýä inýär.Kaka bilen Karolin 2015-nji ýylda aýrylyşýarlar. 2019-njy ýylda braziliýaly fotomodel Karolina Dias bilen adaglanan Kaka twitterde 10 million yzarlaýyja ýeten ilkinji türgen bolupdy (2012).
Oňa Kaka adynyň dakylmagy täsin bolýar. Kakanyň jigisi Digao öz doganynyň adyny ýagny Rikardo diýen ady gowy aýdyp bilmeýär eken. Oňa Kaka diýýär eken. Şol sebäpli-de onuň ady Kaka bolup galýar. Ýeri gelende aýtsak, Kakanyň inisi Digao hem futbolçy bolup, kiçeňräk klublarda az wagtlyk çykyş edýär. Elbetde, oňa agasynyň ýeten şöhratyna ýetmek başartmaýar.