Tamamlanyp barýan 2017-nji ýylda ýene bir ýyldyz süýndi. “Altyn top” baýragyny Messi we Ronaldodan başga alan futbolçylaryň iň soňkusy Rikardo Izakson dos Santos Leite, has tanalýan ady Kaka professional karýerasyny tamamlandygyny habar berdi. 35 ýaşyndaky braziliýaly ýarymgoragçy soňky sapar ABŞ-nyň “Orlando Siti” klubunda çykyş edýärdi. 2001-nji ýylda professional karýerasyna ýurdunyň “Sao Paulo” toparynda başlan Kaka 2003-nji ýylda “Milana” transfer boldy.
Ol bu toparda “Serie A-da”, Çempionlar ligasynda, UEFA Super Kubogynda, FIFA klublar Dünýä Kubogynda çempionlyk gazandy. 2009-njy ýylda rekord baha “Real Madride” geçen Kaka bu toparda garaşylýan oýny görkezip bilmedi.
Madridliler bilen “La Ligada” hem-de “Kopa del Reýde” 1 kubogy ýokary galdyran braziliýaly oýunçy 2013-nji ýylda ýene-de “Milana” dolandy. 1 ýyldan soňam ABŞ-nyň täze klublaryndan “Orlando Siti” bilen şertnama baglaşdy. 2014-nji ýylda ýarym möwsümlik ilkinji topary “Sao Pauloda” hem çykyş eden Kaka Braziliýanyň düzüminde 92 oýunda 29 gezek tapawutlandy.
Ol 2002-nji ýylda Braziliýa bilen Dünýä Kubogyny-da gazanmagy başardy. 2 çaganyň kakasy Kaka futbolyň taryhynda 3 uly başarnygy “Altyn topy” (şahsy), Çempionlar ligasy (klubda) hem-de Dünýä Kubogyny (milli toparda) gazanan 8 futbolçynyň biridir.
Kaka klub karýerasynda 654 oýunda 208 gol geçirdi.