Italiýaly ozalky futbolçy, meşhur ýyldyz oýunçy Janluka Wialli 58 ýaşynda aradan çykdy.Ol 2017-nji ýyldan bäri onkologik keselden ejir çekýärdi.Euro 2020-de Italiýanyň ýygyndysynda öz jan ýaly dosty baş tälimçi Roberto Mançininiň kömekçileriniň biri bolan Wialli golaýda saglyk ýagdaýy sebäpli bu wezipesini taşlamaly bolupdy.
Wialli köp wagtdan bäri Londonda ýaşaýardy.
1964-nji ýylyň 9-njy iýulynda Italiýanyň Kremona şäherinde dünýä inen Wialli 1980-nji ýylda Kremonesada futbola başlaýar. 4 ýyl bu klubda çykyş edeninden soň özüne uly şöhrat getiren Sampdoriýa toparyna transfer bolýar. 1992-nji ýylda Ýuwentusa geçen Wialli bu topar bilen 1996-njy ýylda Çempionlar Ligasynyň kubogyny gazanýar. 1996-njy ýylda-da Çelsi bilen şertnama baglaşan Wialli bu toparda-da 1999-njy ýyla çenli çykyş edýär.
Klub futbolynda 673 oýunda 259 gol geçiren Wialli Italiýanyň ýygyndysy bilen 1990-njy ýylda Dünýä Kubogynda bürünç medala mynasyp bolýar.Serie A-da Sampdoriýadyr Ýuwentus bilen 2 gezek çempion bolan Wialli milli ýygyndyda 59 duşuşykda 16 sapar tapawutlanýar.
Wialli gysga wagtlyk Çelsidir (1998-2000) Watford (2001-2002) toparlaryna tälim beripdi. 2 çaganyň kakasy Wialli tälimçi hökmünde Çelsi bilen FA Kubogyny, Liga Kubogyny, UEFA Kubokçylaryň Kubogyny, UEFA Super Kubogyny hem-de FA Charity Shield (häzirki Community Shield) kubogyny gazanýar.
Ýeri gelende aýtsak, golaýda Serie A-da ençeme ýyl çykyş eden serbiýaly meşhur goragçy Sinişa Mihailowiç hem onkologik keselden aradan çykypdy.