Şu gün irden futbol boýunça Türkmenistanyň milli ýygyndysy Indoneziýa bilen boljak ýoldaşlyk oýnundan öňki ahyrky türgenleşigini geçirdi.
Türkmenistanyň milli ýygyndysynyň metbugat gullugynyň habar bermegine görä, Türkmenistan bilen Indoneziýanyň milli ýygyndylarynyň arasyndaky ýoldaşlyk oýny Aşgabat wagty bilen sagat 17:30-da başlanar. Duşuşyk Indoneziýanyň Surabaý şäherindäki Gelora Bung Tomo stadionynda bolup geçer. Türkmenistanyň ýygyndysy bu oýunda ak reňkli köýnekçede hereket eder.
Duşuşyk Indoneziýanyň Futbol federasiýasynyň YouTube kanalynda göni ýaýlymda görkeziler.
Ozal habar berşimiz ýaly, golaýda Türkmenistanyň milli ýygyndysynyň baş tälimçisi Mergen Orazow sentýabrda geçiriljek ýoldaşlyk duşuşyklaryna (Indoneziýa we Bahreýn bilen) gatnaşjak 23 oýunçynyň sanawyny mälim edipdi.
Ýeri gelende bellesek, bu ýoldaşlyk duşuşyklary türkmen futbolçylary üçin 2023-nji ýylyň noýabr aýynda başlanjak DÇ-2026-nyň saýlama tapgyryna taýýarlyk bolup hyzmat eder.