Ispaniýanyň “La Ligasynda” ädimme-ädim çempionlyga golaýlap barýan “Barselona” topary 27-nji tapgyrda “Atletikony” 10 hasabynda utupdy. Şol oýunda katalonlara ýeňiş getiren ýeke-täk pökgini super ýyldyz Lionel Messi öz adyna ýazdyrypdy.
Messiniň bu goly taryhy görkeziji hökmünde hasaba alyndy. Ýagny Messi resmi oýunlarda 600-nji goluny geçirip (soňky oýunlary-da goşanyňda 603), ol taryhda muny başaran 7-nji futbolçy boldy.
Lionel Messi şu wagta çenli “Barselona” bilen 542 gol, ýagny “La Ligada” 374, UEFA Çempionlar ligasynda 100, Ispaniýa Şa Kubogynda 47, Ispaniýa Super kubogynda 13, FIFA Dünýä klublar çempionatynda 5, UEFA Super kubogynda-da 3 gezek tapawutlandy. 30 ýaşyndaky ýyldyz oýunçy Argentinanyň ýygyndysynda-da 61 goly öz adyna ýazdyrdy.
Eýsem Messiden öň haýsy futbolçylar 600-den köp gol geçirdikä?!.Argentinaly oýunçydan ozal, onuň ähli babatda ezeli bäsdeşi Kristiano Ronaldo bu hormata eýe bolupdy.Ronaldo “Sporting”, “Mançester Ýunaýted” hem-de “Real Madridiň” düzüminde 566, Portugaliýanyň ýygyndysynda-da 79 gezek tapawutlanyp, häzirlikçe 646 gol bilen 6-njy orunda barýar.
Futbol karýeralarynda Ronaldo 16-njy, Messi 14-nji möwsümlerini geçirýärler.Ronaldo 33, Messi 30 ýaşynda.Her ýylda azyndan 4050 gol geçirýän super ýyldyzlaryň ýene-de näçe wagtlap karýeralaryny dowam etdirjekdiklerini hem-de näçeräk gol geçirjekdiklerini häzirden aýtmak kyn. Ýöne şu depginlerini saklan ýagdaýlarynda, olaryň ikisiniň-de 5-nji hatardaky Gerd Müllerden ozmaklary mümkin.
Germaniýaly rowaýaty oýunçydan öňe geçmekleri üçin Ronaldonyň 89, Messiniň 132 gezek tapawutlanmagy gerek.Gerd Mülleriň 735 goly bar.4-nji orunda diňe bir wenger futbolynyň däl, eýsem dünýä futbolynyň-da ägirtlerinden Ferenç Puşkaş bar. 2006-njy ýylda 79 ýaşynda aradan çykan Puşkaş 19431966-njy ýyllar aralygynda 754 oýunda 746 goly öz adyna ýazdyrdy.
Ençeme ýyllap “Real Madridiň” köýnekçesini geýen Puşkaş milli ýygyndyda iň köp gol geçiren ýewropaly futbolçy diýen derejäniň häzirki wagtda-da eýesidir.Braziliýanyň ägirtlerinden, futbolyň şasy Pele 3-nji basgançakda barýar.
Dünýä Kubogyny 3 gezek asmana göteren ýeke-täk futbolçy bolan Pele 21 ýyllyk karýerasynda “Santos” toparynda hem-de 3 möwsüm ABŞ-nyň “Nýu Ýork Kosmos” klubunda oýnady. “Santos” bilen “Kopa Libertadoresde” 2 çempionlyk gazanan Pele milli toparda 92 oýunda 77 gol geçirdi.
Umumylykda, 831 resmi oýunda 767 gol geçiren Pele 3-nji hatarda barýar.Onuň oýnan ähli duşuşyklaryny hasaba alanyňda bolsa, IFFHS-niň maglumatlaryna görä, Pele 1363 oýunda 1281 gezek tapawutlanypdyr.2-nji orny-da braziliýaly başga bir futbolçy Romario eýeleýär. 4 ýurtda çempionlyk gazanan hüjümçi 24 ýyllap ýaşyl meýdançalarda çykyş etdi. 19852009-njy ýyllar aralygynda 994 gezek meýdança çykan Romario 772 pökgini derwezä girizdi. 43 ýaşynda futboly taşlan Romario özüniň şahsy hasabatyna görä, 1000-denem köp gol geçiripdir. Ýöne onuň statistikasy resmi maglumatlar bilen gabatlaşmaýar.Sanawyň başyny çehiýaly Ýosef Bisan çekýär. 1913-nji ýylda dünýä inen Bisan bu babatda dünýä rekordynyň eýesidir. 21-nji asyryň iň netijeli futbolçysy saýlanan Bisan 19311955-nji ýyllar aralygynda Awstriýa bilen Çehoslowakiýanyň çempionatlarynda çykyş edýär.
Iki milli ýygyndynyň-da köýnekçesini geýen Ýosef Bisanyň depeninden köprägi gol bolupdyr.Ol jemi 530 oýunda 805 gol geçiripdir (ortaça 1,51 gol).Ortaça alnanda-da, gönümel alnanda-da, bu iň ýokary görkeziji hasaplanýar.
Tizligi bilenem tapawutlanýan Bisan 2001-nji ýylda 88 ýaşynda aradan çykýar.