Syçan däl, towşan däl, keýigem däl.Dünýäniň iň kiçi goşatoýnakly jandaryna köp dilde syçan-keýik (lat: “Tragulidae”) diýilýär.Onuň uzynlygy 40-85 sm, agramy 2-12 kg aralygynda bolýar.
Bu şahsyz jandarlar kiçijik keýige meňzeýär.Jandaryň iki sany uzyn dişi bolýar.Açyk goňur ýa-da çal reňkli bu haýwanlaryň esasy dört görnüşi bar.Göwresine görä inçe aýakly, kiçi kelleli, ýiti burunly we uly gözli keýijekler köplenç gijesine daşary çykýar.
Afrikanyň we Aziýanyň tropik tokaýlyklarynda ýaşaýan bu jandarlaryň iň ulusy towşan ýalyrak bolýar.Olaryň daşky görnüşi Günorta Amerikadaky aguti gemrijilerine meňzeýär.Olar suwa golaý ýerlerde mesgen tutunýarlar. Ürkek bolansoň, adamlardan gizlenip ýaşaýarlar. Şol sebäpli olary görmek aňsat däl. Ýapraklar, otlar, güller we agaçdan gaçan miweler bilen iýmitlenýärler.
Käbir görnüşi örän seýrek ýagdaýda, balyk, mör-möjekler bilen hem iýmitlenýär.Bu jandaryň iň uly görnüşlisiniň (tragulus napu) uzynlygy 70-75 sm, beýikligi 30-35 sm, guýrugynyň uzynlygy 5-8 sm töweregi.
Onuň aýaklarynyň ýogynlygy galamyňka barabar. Örän seýrek duş gelýän bu görnüş 14 ýyl çemesi ýaşaýar.Olar gijesine otlamak üçin belli bir ýodajyk ýasaýarlar we diňe şondan gidip-gelýärler.
Olary eldekileşdirmek hem kyn däl. Ýyrtyjy süýdemdirijiler, guşlar we uly süýrenijiler olaryň ganym duşmanlarydyr.Bu jandar Malaý ýarymadasynda (Wýetnam, Kamboja, Tailand, Mýanma, Malaýziýa, Singapur) hem-de Indoneziýanyň Sumatra we Borneo adalarynda giňden ýaýrandyr.