Mundan 82 ýyl ozal şu gün, ABŞ-nyň Nýu Ýork şäherinde ähli döwürleriň iň gowy romantiki-drama görnüşdäki filmleriniň sanawynda öňdäki orunlary eýeleýän “Kasablanka” (Casablanca) filminiň ilkinji görkezilişi geçirilýär.
Maýkl Kurtisiň surata düşüren bu filminde baş keşpleri şol döwürleriň super ýyldyzlary, Hollywood-yň ägirtlerinden Hamfri Bogart, Ingrid Bergman, şol sanda Pol Henreid, Klod Reýns, Konrad Weidt, Sidni Grinstrit Piter Lorre ýaly artistler dürli keşpleri janlandyrýar.
“Warner Bros. Pictures, Inc” studiýasynyň önümi bolan ekran eseri üçin ol döwrüň puly bilen 1 million dollara golaý çykdajy edilýär. Film 1943-nji ýylyň ýanwaryndan başlabam tutuş ABŞ-da görkezilip ugraýar. Film 7 million dollara kassa ýygymyny toplaýar.
Oskar baýraklaryna 8 ugurdan dalaşgär görkezilen ekran eseri iň gowy film, iň gowy režissýor hem-de iň gowy ssenariý baýraklaryny gazanýar.