Mary welaýatynyň Wekilbazar etrabynyň Mollanepes şäherçe medeniýet öýünde Türkmenistanyň Magtymguly adyndaky Ýaşlar guramasynyň Merkezi Geňeşi bilen Bilim ministrligi tarapyndan Milli bahar baýramy mynasybetli ýurduň umumybilim berýän orta mekdepleriniň 2-4-nji synplarynda okaýan okuwçy gyzjagazlaryň arasynda yglan edilen Iň eýjejik gyzjagaz — 2022 atly şadyýan bäsleşigiň Mary welaýat tapgyry geçirildi.
Oňa bäsleşigiň şäher, etrap tapgyrlarynda ýeňiji bolan zehinli gyzjagazlaryň ençemesi gatnaşdy.
Maru — şahu jahan welaýat gazetiniň habar bermegine görä, bäsleşige gatnaşan gyzjagazlar 1-nji şert boýunça Türkmenistanyň Prezidenti Gurbanguly Berdimuhamedowyň baştutanlygynda alnyp barylýan döwletli işleri, bagtyýar çagalygy, dost-doganlygy, sporty wasp edýän şirin aýdymlar bilen joşgunly çykyş etdiler.
Ikinji şert boýunça olar egnindäki milli lybaslaryny, dakynan şaý-seplerini şahyrana wasp etdiler. Üçünji şert boýunça bolsa, gyzjagazlar öz ýaş aýratynlyklaryna görä, ene-mamalardan miras galan, nesilden-nesle geçip gelýän milli el işleriniň dürli görnüşlerini uly höwes bilen ýerine ýetirdiler.
Bäsleşigiň ahyrynda eminler toparynyň gelen netijesine laýyklykda 1-nji orna Türkmengala etrabyndaky daşary ýurt dillerine ýöriteleşdirilen 1-nji orta mekdebiň 2-nji synp okuwçysy Elwan Ibragimowa, 2-nji orna şol etrapdaky 14-nji orta mekdebiň 3-nji synp okuwçysy Nurana Kakamyradowa, 3-nji orna bolsa, Mary şäherindäki 24-nji zehinli ýaşlar mekdebiniň 4-nji synp okuwçysy Arzuw Taganowa, Ýolöten etrabyndaky tebigy ugurlara ýöriteleşdirilen 43-nji orta mekdebiň 2-nji synp okuwçysy Gülpam Haýdarowa, şol etrapdaky 12-nji orta mekdebiň 2-nji synp okuwçysy Aýjemal Ataýewa mynasyp boldular. 1-2-nji orunlary eýelän eýjejik gyzjagazlara bäsleşigiň döwlet tapgyrynda hem uly üstünlikler arzuw edildi.
Ýeňijilere TMÝG-niň welaýat geňeşiniň ýadygärlik sowgatlary, şeýle hem Hormat hatlary dabaraly ýagdaýda gowşuryldy.