Ýewropa Bileleşigine agza ýurtlarda şu ýylyň maý aýynda ýel we Gün energiýa beketlerinden alnan elektrik energiýasynyň möçberi gazylyp alynýan ýangyçlardan alnan elektrik energiýasyndan köp bolupdyr. Şeýlelikde, sebitde ilkinji gezek bir aýlap, gaýtadan dikeldilýän çeşmelerden alnan elektrik energiýasy adaty çeşmelerdäkiden öňe geçipdir.
“Ember” şereketiniň maglumatlaryna görä, maý aýynda sebitde öndürilen elektrik energiýasynyň üçden biri ýel we Gün beketlerinden üpjün edilipdir.Kömür we beýleki gazylyp alynýan çeşmelerden öndürilen elektrik energiýasy 27 göterim bolupdyr. Şeýlelikde howany zaýalaýan çeşmeleriň möçberi ähli elektrik energiýasynyň dört birine golaýlapdyr.
Bilermenler gazylyp alynýan çeşmelerden alynýan elektrik energiýasynyň görnetin azalyşynyň dowam edýändigini belleýärler.Bu pese gaçyş geçen ýylyň soňky aýlarynda başlapdyr.Käbir Ýewropa ýurtlary köp mukdarda kömür sarp edýändigine garamazdan, maý aýynda kömürden alnan elektrik energiýasy umumy öndürilen elektrik energiýasynyň bary-ýogy 10 göterimini emele getiripdir.
Bu ýagdaý Germaniýanyň soňky atom bekedini ýapandygyna garamazdan bolupdyr. Ýurtda kömürden öndürilýän elektrik energiýasy 2020-nji ýyldan bäri iň pes derejesine ýetipdir. Ýewropanyň kömürden elektrik energiýasy öndürmekde öňdebaryjy ýurdy Polşada-da kömrüň elektrik energiýasyndaky paýy rekord derejede peselip, 62 göterime çenli düşüpdir. Şeýle hem tebigy gazdan alynýan elektrik energiýasy hem 2018-nji ýyldan bäri iň pes derejä ýetipdir.
Mähriban Agajanowa, Türkmenistanyň Döwlet energetika institutynyň talyby.