AFK Kubogynyň toparçalarynda çykyş etjek klublarymyzyň duşuşyklaryna şu gün badalga berler.Yklymyň ikinji derejeli klub ýaryşy bolan AFK Kubogyna ýurdumyzyň adyndan çempion “Altyn asyr”, şeýle-de “Köpetdag” toparlary wekilçilik edýärler. “Altyn asyr” topary 8-nji gezek gatnaşýan ýaryşynda “E” toparçada Özbegistanyň “Sogdiana” (Jizzah), Täjigistanyň “SSKA Pamir” (Duşanbe) hem-de Gyrgyz Respublikasynyň “Neftçi” (Koçkor-Ata) toparlary bilen duşuşar.
Toparçada her klub 3 duşuşyk geçirer. Ýagny her klub bir-biri bilen özara 1 gezek duşuşar.Duşuşyklaryň ählisi-de merkezleşdirilen ýerde, ýagny Täjigistanyň paýtagty Duşanbe şäherindäki 20 müň orunlyk “Pamir” stadionynda oýnalar.
“Altyn asyr” topary ilkinji duşuşygyny şu gün ýer eýerleri “SSKA Pamir” bilen geçirer. Duşuşyk 22:00-da başlar. Aragatnaşykçylaryň 2-nji duşuşygy 27-nji iýunda “Neftçi” bilen bolar. “Altyn asyr” topary toparçadaky soňky duşuşygynda 30-njy iýunda “Sogdiana” bilen duşuşar. Toparçada 1-nji orny eýelän klub ýaryşy dowam eder.
Bu bäsleşige ilkinji gezek gatnaşýan “Köpetdag topary “F” toparçada Täjigistanyň “Hujand” (Hujand) hem-de Gyrgyz Respublikasynyň “Dordoý” (Bişkek) toparlary bilen güýç synanyşar. “Köpetdag” şu gün “Hujand” bilen duşuşar.
Duşuşyk 19:00-da başlar.Paýtagtymyzyň wekili 27-nji iýunda “Dordoý” bilen oýnar (19:00).Toparçada 1-nji orny eýelän klub indiki tapgyra çykar.Duşuşyklaryň ählisi-de Bişkekdäki Dolen Omurzakowyň adyny göterýän stadionynda oýnalar.
Ýeri gelende aýtsak, “Köpetdag” “Hujand” hem-de “Altyn asyr” “SSKA Pamir” duşuşyklary Täjigistanyň “Warzish” teleýaýlymy arkaly göni ýaýlymda görkeziler.