Hytaýyň “Huawei” kompaniýasy resmi internet saýtynda “Honor” brendini satandygyny mälim etdi. “Honor” tehniki aýratynlyklary göz öňünde tutulanda bahasy amatly, başga söz bilen aýdylanda, alanyňa degýän telefonlary we beýleki elektron enjamlary öndürýär.
Brend “Shenzhen Zhixin New Information Technology Co.Ltd” atly konsorsiuma satyldy.Ylalaşyga görä, “Huawei” “Honor” daky 98,6 göterim bolan ähli paýnamasyny satdy.Paýnamanyň 1,4 göterimine Şençženiň ýerli häkimiýeti eýeçilik edýär.
Resmi beýanatda aýdylyşyna görä, eýeçiligi üýtgänden soňra hem “Honor”-yň ýokary derejeli işgärleri hem-de 7 müňden gowrak işgär öz işlerine dowam eder.
“Honor” 2013-nji ýylda amatly elektron enjamlary öndürmek maksady bilen döredildi. Geçen ýedi ýylyň dowamynda her ýylda ortaça 70 million smartfony müşderilere ýetirdi.