Formula 1 boýunça möwsümiň 12-nji bäsleşigi Portugaliýada geçirildi. 24 ýyldan soň, F1 ýaryşyny guran Portugaliýa “Gran
Prisinde” “Mercedes” toparynyň britan sürüjisi Lýuwis
Hamilton ýeňiş gazandy. 1-nji orundan başlan Hamilton
66 aýlawy 1 sagat
29 minut 56,828
sekuntda pellehana geldi. Bu onuň şu möwsümdäki 8-nji ýeňşi boldy. Şeýle-de karýerasyndaky 92-nji ýeňşini gazanan Hamilton
bu ugurda Mihael
Şumaheriň 19 ýyllyk rekordyny täzelemegi
başardy. 35 ýaşyndaky Hamilton 24 ýurtda ýeňiji
bolup, bu ugurda-da öz rekordyny ösdürdi.
Ýaryşda Hamiltondan 25,5 sekunt yza galan finlýandiýaly topardaşy Waltteri Bottas 2-nji,
“Red Bulluň”
niderland sürüjisi Maks Werstappen 3-nji ýeri eýeledi.
Bu ýeňişden soň, utuk aratapawudyny 77-ä çykaran Hamilton möwsümiň tamamlanmagyna 5 tapgyr
galanda, 7-nji çempionlygyna golaýlap barýar.
Britaniýaly pilot 7-nji dünýä çempionlygyny
gazanan ýagdaýynda bu ugurda-da Mihael Şumaheriň
rekordyna şärik bolar. Hamiltonyň 256, Bottasyň 179 hem-de Werstappeniň 162 utugy bar.
Möwsümiň 13-nji bäsleşigi Emilia-Romagna “Gran Prisi” 1-nji noýabrda Italiýada geçiriler.