Hormatly Prezidentimiziň ýolbaşçylygynda türkmen halky dünýä jemgyýetçiligi bilen bilelikde Halkara Bitaraplyk gününi belleýär. Türkmenistanyň başlangyçy bilen Birleşen Milletler Guramasynyň Baş Assambleýasy tarapyndan 12 dekabr Halkara Bitaraplyk güni hökmünde bellenildi. Bu baýramçylygyň dünýä jemgyýetçiligi tarapyndan giňden bellenilmegi Türkmenistanyň daşary syýasatynyň nobatdaky üstünligidir.
Halkara Bitaraplyk güni mynasybetli Türkmenistanyň Söwda-senagat edarasynyň binasynda Beýik Ýüpek ýolunyň mirasy we häzirki zaman halkara gatnaşyklary atly halkara ylmy maslahaty geçirildi.
Maslahata gatnaşyjylara hormatly Prezidentimiz Gutlag hatyny iberdi.Milli Liderimiziň Gutlag hatynda: “2018-nji ýylyň Türkmenistan — Beýik Ýüpek ýolunyň ýüregi diýlip yglan edilmegi bilen şu günki halkara maslahatyň gün tertibiniň mazmun taýdan umumylygy hem çuňňur mana eýedir.
Adamzat taryhynyň aýrylmaz bölegi bolan Beýik Ýüpek ýolunyň parahatçylyk we howpsuzlyk ýörelgeleri häzirki döwürde dünýä ýüzünde parahatçylygy we howpsuzlygy berkitmekde wajyp ähmiýete eýedir.Beýik Ýüpek ýolunyň ugrunda emele gelen ägirt uly ruhy miras dürli medeniýetleriň ýakynlaşmagyny, açyklygy we özara ynanyşmagy aňladýar. Şu nukdaýnazardan, halkara gatnaşyklarda bitaraplyk syýasaty bu ýörelgeleri berjaý etmegiň hakyky nusgasy bolup durýar” diýlip bellenilýär.
Maslahatyň çäklerinde Birleşen Milletler Guramasynyň Baş sekretarynyň ynsanperwer meseleleri boýunça kömekçisi Raşid Halikow, Türkmenistanyň BMG-niň ýanyndaky hemişelik wekili Aksoltan Ataýewa, BMG-niň Türkmenistandaky Hemişelik utgaşdyryjysy, BMG-niň Ösüş maksatnamasynyň Türkmenistandaky Hemişelik wekili hanym Ýelena Panowa we beýlekiler çykyş etdiler.
Çykyş edenler milli Liderimiziň ýolbaşçylygynda Türkmenistanyň alyp barýan oňyn bitaraplyk syýasatynyň dünýäde parahatçylygyň hem-de abadançylygyň üpjün edilmegine möhüm goşant goşýandygyny bellediler. Şeýle hem hormatly Prezidentimiziň öňe sürýän halkara başlangyçlarynyň hem parahatçylygyň, howpsuzlygyň hem-de asudalygyň üpjün edilmegine hyzmat edýändigi nygtaldy.
Şeýle hem maslahatyň çäklerinde ýurdumyzyň pudak edaralarynyň, ýokary okuw mekdepleriniň, Türkmenistandaky daşary ýurtly ilçihanalaryň gatnaşmagynda sergi hem guraldy.