28-nji sentýabrda Halkara Ahalteke atçylyk sport toplumynda Türkmenistanyň Garaşsyzlygynyň 32 ýyllygy mynasybetli at çapyşyklary geçirildi. Ahalteke bedewleri 7 çapyşykda dürli aralyklarda öz okgunlylygyny, ýyndamlygyny görkezdiler.
Ilkinji iki çapyşyk üçýaşar atlaryň arasynda 1400 metr aralyga geçirildi. Birinji çapyşykda 1 minut 35,2 sekunda deň bolan iň gowy netijäni Türkmenistanyň Prezidentiniň ahalteke atçylyk toplumyna degişli Daýanjym atly dor bedew görkezdi. Onuň çapyksuwary P.Orazow.
Ikinji çapyşykda bolsa Türkmenistanyň Içeri işler ministrligine degişli Gudratlydag atly mele at bellenilen aralygy 1 minut, 35,2 sekuntda geçip, ilkinji bolup pellehana geldi.
Üçünji we dördünji çapyşyklar üçýaşar atlaryň arasynda 1600 metr aralyga geçirildi. 3-nji çapyşykda O.Amangeldiýewiň çapyksuwarlyk etmeginde Türkmenistanyň Prezidentiniň ahalteke atçylyk toplumynyň Gögerçin atly dor aty 1 minut 53,1 sekunt görkeziji bilen ýeňiji bolmagy başardy. 4-nji çapyşykda bolsa Türkmenistanyň Içeri işler ministrliginiň Garaýel atly gara aty 1 minut 52,8 sekuntda pellehana ilkinji bolup geldi.
Onuň çapyksuwary Ussat çapyksuwar M.Seýidow.
Galan çapyşyklarda dörtýaşar we ondan uly bedewler ýaryşdylar. 1800 metr aralyga geçirilen 5-nji çapyşykda Türkmenistanyň Prezidentiniň ahalteke atçylyk toplumynyň Artyk atly dor aty ýeňiji boldy. M.Mämmedowyň ýolbaşçylyk etmeginde Artyk 2 minut 07,5 sekunt netijäni görkezdi.
Soňky iki çapyşyk 2200 metr aralyga geçirildi. 6-njy çapyşykda 2 minut 35,9 sekunt netije görkezip, Türkmenistanyň Prezidentiniň ahalteke atçylyk toplumynyň Bezirgen atly akýal mele aty ýeňiji boldy. Onuň çapyksuwary Üçinji derejeli çapyksuwar M.Agamyradow.
Ahyrky çapyşykda Ussat çapyksuwar B.Agamyradowyň çapyksuwarlyk etmeginde Türkmenistanyň Prezidentiniň ahalteke atçylyk toplumyna degişli Dagbedew atly dor at pellehanadan ilkinji bolup geçmegi başardy. Ol 2 minut 37,4 sekunt netije görkezdi.