Hytaýyň Guangžou şäherinde täze stadionyň gurluşygyna badalga berildi.Daşky keşbi lotos gülüne meňzeş edip guruljak bu täsin desga “Guangžou Ewergrand” toparyna degişli bolar.Amerikaly binagärleriň taslamasy esasynda guruljak stadion 100 müň tomaşaça niýetlenendir.
Ol tomaşaçy sygdyrmak boýunça dünýäniň 4-nji stadiony bolar.Stadionyň gurluşygy üçin 1 milliard 700 million amerikan dollary sarp ediler.Onuň gurluşygyny 2022-nji ýylyň ahyryna çenli tamamlamak göz öňünde tutulýar.
Dünýä belli “Amazon” kompaniýasy Angliýanyň “Premier ligasynyň” wekili “Tottenham Hotspur” toparynyň stadionynyň adynyň hukugyny almak isleýär. Ylalaşyk gazanylan ýagdaýynda London şäheriniň klubunyň “Tottenham Hotspur” atly stadionynyň ady “Amazon” stadiony bolar. Bu ylalaşyk üçin “Amazon” kompaniýasy iňlis toparyna her ýyl üçin 25 million funt sterling tölär. Şertnamanyň möhleti ilkinji tapgyrda 10 ýyl bolar.
Ispaniýanyň “Real Madrid” topary özüniň meşhur stadiony “Santiago Bernabeunyň” durkuny täzelär. Täzeçe keşbe bürenjek bu stadionyň üçegi gerek bolan ýagdaýynda ýapylyp bilner. Stadionyň abatlaýyş işleriniň 2022-nji ýylyň oktýabr aýynda tamamlanmagyna garaşylýar.