Gyrgyz Respublikasynyň demir ýol edarasynyň (Kyrgyz Temir Žoly) habar bermegine görä, 6-njy iýundan başlap, Bişkek Kazan Bişkek halkara ýolagçy otly gatnawy ýola goýulýar. Şeýlelikde, Russiýa bilen Gyrgyz Respublikasynyň arasynda yzygiderli ýolagçy otly gatnawlary gaýtadan dikeldildi. 8-nji iýundan başlap, gyrgyz paýtagtyndan Russiýanyň Samara şäherine we yzyna, 9-njy iýundan Nowosibirsk şäherine gatnawlar açylar.
Bişkek Kazan ugry boýunça hepdede bir gezek; Bişkek Samara ugry boýunça çarşenbe, anna günleri; Bişkek Nowosibirsk ugry boýunça sekiz günde bir gezek otly gatnawy amala aşyrylar.
Bu baradaky habarda ýolagçylara Gazagystanyň we Russiýanyň daşary ýurtly syýahatçylaryň COVID-19 bilen bagly berjaý etmeli düzgünleri bilen tanyşmak maslahat berilýär.
Bu gatnawdan peýdalanýan ýolagçylardan soňky 48 sagadyň dowamynda COVID-19 barlagyndan geçendigini tassyklaýan resminamasy talap ediler.
Iki ýurduň arasyndaky yzygiderli otly gatnawlary 2020-nji ýyl martynda koronawirus pandemiýasy sebäpli ýatyrylypdy.