Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadag Gurbanguly Berdimuhamedow Türkmenistanyň Prezidenti Serdar Berdimuhamedowa Türkmenistanyň Arkadag medaly bilen sylaglanmagy mynasybetli gutlag iberdi. Bu barada Watan habarlar gepleşiginde habar berildi.
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadag Gurbanguly Berdimuhamedowyň gutlagynda, hususan-da, şeýle diýilýär:
— Çuňňur hormatlanylýan Türkmenistanyň Prezidenti!
Siziň eziz Diýarymyzda Türkmenistanyň saglygy goraýyş we derman senagaty işgärleriniň hünär baýramynyň giňden bellenilýän günlerinde Türkmenistanyň Arkadag medaly bilen sylaglanylmagyňyz mynasybetli Türkmenistanyň Halk Maslahatynyň adyndan tüýs ýürekden mähirli gutlaýaryn.
Siziň janyňyzyň sag, ömrüňiziň uzak bolmagyny, halkymyzyň bagtyýarlygy, asudalygy, döwletimiziň belent maksatlara barýan rowaç geljegi ugrunda alyp barýan tutumly işleriňiziň mundan beýläk hem üstünliklere beslenmegini arzuw edýärin!
Hormatly Prezidentimiz!
Siziň baştutanlygyňyzda ilatyň durmuşynyň hilini ýokarlandyrmak, beden hem-de ruhy taýdan kämil nesli terbiýeläp ýetişdirmek baradaky alada Garaşsyz, hemişelik Bitarap Türkmenistanyň döwlet syýasatynyň ileri tutulýan ugurlary bolmagynda galýar. Siziň tagallalaryňyz bilen ýurdumyzda eneligi we çagalygy goramagyň döwlet kepillikleriniň berk hukuk binýady döredildi, halkymyzyň döwrebap şertlerde ýaşamagy, dynç almagy, saglygyny berkitmegi we dikeltmegi ugrunda giň gerimli işler üstünlikli alnyp barylýar.
Siziň başda durmagyňyzda ýurdumyzyň saglygy goraýyş edaralarynyň işi yzygiderli kämilleşdirilýär. Hususan-da çagalaryň saglygyny goramak maksatly häzirki zamanyň iň ýokary talaplaryna laýyk gelýän enjamlar bilen enjamlaşdyrylan sagaldyş-dikeldiş merkezleri gurulýar. Arkadag şäherindäki Gurbanguly Berdimuhamedow adyndaky Çagalar sagaldyş-dikeldiş merkezinde döredilen amatly şertler munuň aýdyň subutnamasydyr.
Belent mertebeli Prezidentimiz!
Siziň ýolbaşçylygyňyzda ýurdumyzda ösüp gelýän nesil üçin uly mümkinçilikler, ähli şertler döredilýär. Şunda goldawa mätäç çagalara aýratyn uly üns berilýär. Bu ugurda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy, Gaznanyň ýanyndaky Ýaşulular Geňeşi tarapyndan işler yzygiderli alnyp barylýar. Gazna döwletimiziň ynsanperwer durmuş syýasatynyň üstünlikli durmuşa geçirilmegine, haýyr-sahawatlylyk işiniň dabaralanmagyna saldamly goşant goşýar.
Baýramçylyk günleri Siziň ýurdumyzda adamyň kanuny bähbitlerini goramak we üpjün etmek boýunça hukuk kepilliklerini döretmekde, ata-babalarymyzyň asylly ýörelgelerini özünde jemleýän Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işine yzygiderli goldaw bermekde, ýurdumyzda ynsanperwerlik, adalatlylyk, sahawatlylyk, ýörelgelerini durmuşa geçirmek bilen haýyr-sahawat işini ösdürmekde bitiren görnükli hyzmatlaryňyzy göz öňünde tutup, Türkmenistanyň Arkadag medaly bilen sylaglanylmagyňyz halkymyzyň şatlygyny has-da goşalandyrdy.
Hormatly Arkadagly Gahryman Serdarymyz!
Siz täze taryhy döwrümizde ynsanperwerligiň, sahawatlylygyň, kömege mätäje ýardam bermegiň, howandarlygyň belent nusgasyny görkezýärsiňiz.Siziň tagallaňyz bilen Türkiýede bolup geçen pajygaly ýer titremede ejir çeken çagalara, Ukrainanyň çagalaryna, doganlyk Owganystanyň halkyna, Russiýa Federasiýasynyň Primorskiý kraý sebitiniň çagalaryna derman we saglygy goraýyş maksatly serişdeler, dokma önümleri we dürli azyk önümlerinden ybarat bolan ynsanperwer ýükleriniň iberilmegi hem munuň aýdyň subutnamasydyr.
Bu haýyr-sahawat işleri türkmen halkynyň ynsanperwerlik ýörelgelerine we däp-dessurlaryna esaslanyp, hoşniýetli goňşuçylyk we dostlukly gatnaşyklaryň binýadyny has-da berkidýär.
Sarpasy belent Prezidentimiz!
Siziň tagallalaryňyz bilen täze taryhy döwrümizde üstünlikli durmuşa geçirilýän maksatnamalar, gazanylýan ajaýyp üstünlikler bu gün bütin halkymyzy çäksiz buýsandyrýar we galkyndyrýar.Bu guwandyryjy ösüşler, ilkinji nobatda halkymyzyň ýaşaýyş-durmuş derejesini has-da ýokarlandyrmaga, eziz Watanymyzyň röwşen geljegi bolan çagalaryň bagtyýar şu gününi we ýagty geljegini üpjün etmäge gönükdirilendir.
Bu bolsa dünýä giňişliginde parahatçylygyň, agzybirligiň we ynsanperwerligiň Watany hökmünde tanalýan ýurdumyzda ylymly-bilimli, ruhy taýdan kämil, beden taýdan sagdyn nesli terbiýeläp ýetişdirmäge döwlet syýasatynda aýratyn möhüm ähmiýet berilýändigine ýene-de bir gezek şaýatlyk edýär.
Hormatly Prezidentimiz!
Siziň ýurdumyzyň toý-baýramlara beslenýän günlerinde Türkmenistanyň Arkadag medaly bilen sylaglanylmagyňyz mynasybetli Türkmenistanyň Halk Maslahatynyň adyndan ýene-de bir gezek tüýs ýürekden mähirli gutlaýaryn.
Siziň janyňyz sag, ömrüňiz uzak, il-ýurt bähbitli, umumadamzat ähmiýetli tagallalaryňyz mundan beýläk hem rowaç bolsun!