Çärýek asyra golaý (23 ýyl) wagt soň “Premier Liga” dolanan “Nottingam Forest” topary 18-nji transferini amala aşyrdy.Iňlis kluby “Atletiko Madridiň” goragçysy Renan Lodini möwsümiň ahyryna çenli kärendesine düzümine goşdy. “Nottingam” topary möwsümiň ahyrynda-da 30 million ýewro berip, ymykly transfer hem edip biler. “Nottingam” kärende tölegi üçin ispan toparyna 5 million ýewro berer. 24 ýaşyndaky braziliýaly goragçy 2019-njy ýylda ispan toparyna transfer bolupdy.
* * *
Fransiýanyň PSŽ topary ispaniýaly ýarymgoragçysy Ander Herrerany ozalky kluby “Atletik Bilbao” ugratdy. 33 ýaşyndaky oýunçy bilbaolylar bilen 1 ýyllyk kärendesine şertnama baglaşdy. “Atletik” topary möwsümiň ahyrynda Herrerany ymykly transfer etmek hukugyna hem eýe boldy. Herrera 2011-2014-nji ýyllar aralygynda “Atletikde” çykyş edipdi. Ondan soň 2019-njy ýyla çenli-de “Mançester Ýunaýtediň” köýnekçesini geýdi.
* * *
“Serie A”-nyň güýçli klublaryndan “Roma” italiýaly hüjümçi Andrea Belottini transfer etdi. Erkin agent ýagdaýynda rimlileriň düzümine goşulan 28 ýaşyndaky hüjümçi “Roma” bilen 1+2 ýyllyk şertnama baglaşdy. Belotti “Torinonyň” düzüminde 7 möwsüm çykyş edip, ol 251 oýunda 113 gol geçirdi, 28 goluň pasyny berdi. Belotti “Torinodan” öň “AlbinoLeffe” hem-de “Palermo” klublarynda oýnapdy.