Türkiýäniň “Fenerbahçe” topary ikinji liga düşen italýan topary “Kaliariniň” asly brazil italýan hüjümçisi Žoao Pedrony transfer etdi.Stambullylar 30 ýaşyndaky hüjümçi bilen 3 ýyllyk şertnama baglaşdy. “Fenerbahçe” topary italýan klubuna 4,7 million ýewro tölär.
Doly ady Žoao Pedro Žeraldino dos Santos Galwao bolan futbolçy “Kaliaride” 8 möwsümde 271 oýunda 81 gol geçirdi. Žoao Pedro bilen “Galatasaraý” hem gyzyklanýardy.
23 ýyldan soň “Premier Liga” dolanan “Nottingam Forest” topary “Mançester Ýunaýted” bilen şertnamasy tamamlan Jessi Lingardy düzümine goşdy. 29 ýaşyndaky oýunçy täze kluby bilen 1 ýyllyk şertnama baglaşdy. Lingard 2011-nji ýyldan bäri “Mançester Ýunaýtedde” 232 duşuşykda meýdança çykdy. Ol täze klubunda 10-njy belgili köýnekçäni geýer. Lingard “Nottingam Forest” toparynyň 11-nji transferi boldy.
Angliýanyň “Tottenham” topary 2-nji liganyň, ýagny “Championship”-iň wekili “Middlsbro” toparynyň sag gyraky goragçysy Džed Spensi transfer etdi.Londonlylar 21 ýaşyndaky iňlis oýunçy bilen 5 ýyllyk şertnama baglaşdy.
Geçen möwsümde “Nottingam Forest” toparynda kärendesine çykyş eden Spensiniň transfer tölegi hökmünde “Tottenham” topary 20 million funt sterlini, “Middlsbro” toparyna berer.Spens “Tottenhamyň” şu möwsümdäki 6-njy transferidir.
Türkiýäniň başga bir kluby “Galatasaraý” topary düzümini şweýsariýaly hüjümçi Haris Seferowiç bilen güýçlendirdi. Stambul şäheriniň wekili “Benfikanyň” hüjümçisini 1 ýyllyk şertnama bilen transfer etdi. 30 ýaşyndaky hüjümçi türk klubunda kärendesine çykyş eder. Seferowiç “Benfikada” 5 möwsümde 188 duşuşyk geçirip, şolarda 74 goly derwezä girizdi. Ol “Benfikadan” öň “Aýntraht”, “Real Sosiedad”, “Leççe”, “Fiorentina” ýaly klublarda hem oýnapdy.