2023-nji ýylyň Gonkur baýragy Baptan-Batist Andrea berildi. Ýeňijini yglan etmek dabarasy BFMTV teleýaýlymy arkaly tomaşaçylara ýetirildi. Ýazyjy 2023-nji ýylda çykan “Oňa seresaplylyk bilen çemeleşiň” (Veiller sur elle) romany üçin Fransiýada iň ýokary edebi baýraga mynasyp boldy.
Režissýor we ssenarist hökmünde tanalýan 52 ýaşly laureat ilkinji eserini 46 ýaşynda neşir etdiripdir. Şondan bäri abraýly baýraklara eýe bolan üç romanyny çykarmagy başardy. Andrea öz döredijiliginde fransuz edebiýatynyň ynsanperwer däplerine wepaly bolup galýar.
“Oňa seresaplylyk bilen çemeleşiň” romany, sungata bolan söýgi bilen birleşen dürli sosial gatlaklardan bolan adamlaryň arasynda faşizm döwründe Italiýada bolup geçen söýgi wakasy barada gürrüň berilýär.
Laureat däp boýunça, Pariž operasynyň golaýynda ýerleşýän “Drouant” restoranynda Gonkur akademiýasynyň agzalary üçin nahar wagtynda yglan edildi. Abraýly diplom bilen birlikde laureat bary-ýogy 10 funt sterling baýrak aldy. Şeýle-de ýeňiji kitabyny gaýtadan çap etmek we daşary ýurt dillerine terjime etdirmek üçin ep-esli galam haky alar.
Gonkur baýragynyň berilmegi, adatça, ýeňijiniň kitabynyň tiražyny 400 müň nusga çenli artdyrýar. Muňa gaaramazdan 2020-nji ýylda Erwe Le Tellýeniň Gonkur baýragyna mynasyp bolan “Anomaliýa” (L’Anomalie) romany häzire çenli 1 milliondan gowrak nusgada satyldy.
Baýragy esaslandyran doganlar Edmond we Žýul de Gonkuryň wesýetnamasyna laýyklykda, bu baýrak fransuz dilinde ýazýan awtorlar üçin niýetlenendir. Şeýle-de bolsa, gelip çykyşy boýunça Russiýadan bolan meşhur ýazyjylar – Anri Truaýýa, Elza Triole, Romen Gari, Andreý Makin hem bu baýragyň eýesi boldular.
Öz döwründe Marsel Prust, Moris Drýuon we Andre Malro ýaly tanymal ussatlar bu baýraga mynasyp boldular. Bu baýrak 1903-nji ýyldan bäri her ýyl berilýär. Ömürlik saýlanan Gonkur akademiýasynyň 10 agzasynyň hemmesi meýletin hyzmat edýär we her ýyl, 300-den gowrak roman okamak we dalaşgär saýlamak üçin hiç hili töleg talap etmeýär.