Mundan 24 ýyl ozal meşhur režissýor, taryhy filmleri bilen adygan Ridli Skott “Gladiator” atly epiki drama filmini surata düşüripdi.Hemmäniň söýgüsini gazanan şol filmiň dowamy hökmünde görülýän “Gladiator 2” filmine-de Skottuň özi režissýorlyk edýär. 210 million dollarlyk býujeti bilen ýylyň iri taslamalarynyň biri bolan bu film Marokkoda, Maltada, Angliýada hem-de Italiýanyň paýtagty Rimde surata düşürildi. 148 minutlap dowam edýän filmiň ssenarisini Dewid Skarpa ýazdy.
Ol režissýor bilen “Napoleon” hem-de “Dünýädäki ähli pullar” filminde-de bile işleşipdi.Bilermenlerden ýokary baha alan “Gladiator 2” filminde baş keşpleri janlandyrsa, şol sanda Ýosef Kuinn, Fred Heçinger, ussat aktýor Denzel Waşington dagy dürli keşplerde surata düşdi. 1-nji filmde-de surata düşen Konni Nilsen bilen Derek Jeýkobi ýene-de ozalky keşplerini janlandyrdylar.
Film häzirki wagtda Birleşen Patyşalygyň çäginde görkezilýär we eýýämden 87 million dollardan gowrak kassa ýygymyny toplady. Şu günden başlap bolsa ABŞ-da we beýleki ýurtlaryň kinoteatrlarynda orun aljak ekran eseriniň milliard dollarlyk girdeji gazanan filmleriň hataryna goşulmagyna garaşylýanlaryň sany az däl.
Ýeri gelende bellesek, 2000-nji ýyldaky “Gladiator” filmi üçin 103 million dollar çykdajy edilip, ol prokatdan 465,4 million dollarlyk girdeji toplapdy. Film 12 ugurdan Oskara hödürlenip, şolaryň 5-sinde ýeňiji bolupdy. Iň gowy film saýlanan ekran eseriniň baş keşbini janlandyran Rassel Krow iň gowy aktýor ugry boýunça Oskar gazanypdy.
Filmdäki wakalar Maksimusyň ölmeginden 16 ýyl soňky hadysalary özünde jemleýär. Lusillanyň ogly Lusius Hanno Werus (1-nji filmdäki çagajyk) täze filmiň baş gahrymany bolup, ol ençeme ýyldan soň Rime dolanýar. Ol hem edil Maksimus ýaly Kolizeýde uruşmaga mejbur edilýär. Bu gezek garşydaşlar has ýowuz bolup, ol baş alyp çykmak üçin elinden geleni etmeli bolýar.
Ady: “Gladiator 2” (Gladiator II)
Režissýory: Ridli Skott
Keşplerde: Pol Meskal, Pedro Paskal, Ýosef Kuinn, Fred Heçinger, Lior Raz, Derek Jeýkobi, Konni Nilsen, Denzel Waşington
Ssenariçi: Dewid Skarpa
Prodýuseri: Ridli Skott, Maýkl Pruss, Duglas Wik, Lusi Fişer, Wolter F. Parkes, Lauri MakDonald, Dewid Franzoni
Kompozitory: Harri Gregson-Williams
Öndüriji: “Scott Free Productions”, “Lucy Fisher/Douglas Wick Productions”
Paýlaýjy: “Paramount Pictures”
Dowamlylygy: 148 minut
Görnüşi: taryhy, epiki, uruşly
Ýurdy: ABŞ, Birleşen Patyşalyk
Dili: iňlisçe
Býujeti: 210 million $