Şu gün Türki Döwletleriň Guramasynyň Samarkantda geçirilen sammitiniň çäklerinde Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow Türki dünýäniň ýokary ordeni bilen sylaglanyldy. TDG-niň döwlet Baştutanlarynyň Geňeşiniň çözgüdine laýyklykda, Özbegistan Respublikasynyň Prezidenti Şawkat Mirziýoýew Gahryman Arkadagymyza bu abraýly sylagy dabaraly ýagdaýda gowşurdy.
Türkmenistanyň Milli Geňeşiniň Halk Maslahatynyň Başlygy bu uly sylag üçin minnetdarlyk bildirip, ony Türkmenistana, türkmen halkyna hormatyň nyşany hökmünde kabul edýändigini belledi.
Türki döwletler bilen gatnaşyklar Türkmenistanyň daşary syýasatynda aýratyn orny eýeleýär. Biz Türki Döwletleriň Guramasynyň ägirt uly abraýyny ykrar edýäris. Ata-babalarymyzyň nesihatlaryna eýerip, siziň bilen bilelikde köp işleri amala aşyrýarys diýip, hormatly Arkadagymyz doganlyk döwletleriň arasyndaky gatnaşyklaryň mundan beýläk-de ösdüriljekdigine berk ynanýandygyny tassyklady.
Ýeri gelende bellesek, şu gün Türkiýe Respublikasynyň Prezidenti Rejep Taýýip Erdogan hem türki dünýäniň öňünde bitiren hyzmatlary üçin guramanyň ýokary sylagy bilen sylaglanyldy. Şeýle-de gyrgyz ýazyjysy Çingiz Aýtmatowa Türki Döwletleriň Guramasynyň türki dünýäniň jebisligine goşandy üçin Alişer Nowaýy adyndaky halkara baýragy berildi. Degişli baýrak Gyrgyz Respublikasynyň Prezidenti Sadyr Žaparowa gowşuryldy.