Kaka etrabyndaky Abiwerd taryhy-medeni döwlet goraghanasynyň çägindäki gadymy Abiwerd galasynda gazuw-barlag işleriniň ýazky möwsümine girişildi. Beýik Ýüpek ýolunyň ugrunda ýerleşip, orta asyrlarda Horasanyň meşhur Abiwerd welaýatynyň gür ilatly merkezi hökmünde uly meşhurlyk gazanan bu taryhy galada goraghananyň hünärmenleri tarapyndan ýazky möwsümde ylmy işler alnyp barylýar. Bu barada Türkmenistan gazetinde habar berildi.
Goraghananyň ýolbaşçysynyň aýtmagyna görä, orta asyr Abiwerd galasyny, onuň diwarlaryny, içki galanyň merkezini, şeýle-de kerwensaraýy içgin öwrenmäge aýratyn ähmiýet berilýär.
Geçen möwsümlerde bu taryhy künjekde netijeli işler alnyp baryldy hem-de özünde ylmy maglumatlary saklaýan keramiki gap-gaçlaryň, mis teňňeleriň we beýleki gymmatlyklaryň onlarçasy ýüze çykaryldy.