Halkara “ARETI” şirketler toparynyň prezidenti, welosipedçileriň Halkara bileleşiginiň (WHB) ýolbaşçylar toparynyň agzasy, Türkmenistanda doglan Igor Makarowyň Awstraliýanyň we Kanadanyň gadaganlyk sanawyna goşulandygyny 21-nji aprelde “Inside the games” saýty habar berdi.
Kanadanyň sanawynda 14 şahs bar. Yurdyň hökümeti bu şahslary “rus rejiminiň, şol sanda, oligarhlaryň hem olaryň maşgalasynyň ýakyn egindeşleri hasaplaýar we bularyň Russiýanyň Ukraýina esassyz çozup girmegine gatnaşandyklary üçin olara gadaganlyklar girizildi”.
Makarow Awstraliýanyň sanawyna 6-njy aprelde goşulypdy. Maglumatlara görä, eger DIM “ fiziki we ýuridiki şahslaryň Ukraýinanyň garaşsyzlygyna we terrotorial bütewiligine howp abandyrýandygyna” ynansa, onda fiziki hem ýuridiki şahslaryň sanawa goşulmagy ähtimal.
Awstraliýanyň gadaganlyklaryna aktiwleri doňdurmak we ýurda girmäge rugsat etmezlik girýär.
Makarowyň sanawa goşulmagy şu ýylyň ahyrlarynda geçiriljek WHB-2022 şosse welosiped bäsleşigi boýunça dünýä çempiýonaty bilen ilteşikli bolmagy ähtimal diýip neşir çaklaýar.
Mundan başga-da,WSB-niň Russiýada we Belarusda geçiriljek ähli ýaryşlary ýatyryldy. Şeýlede WSB-niň ähli ýaryşlarynda Russiýanyň,Belarusyň emblemalary, atlary, baýdaklary we gimnleri gadagan.
Ýöne, neşiriň bellemegine görä, Igor Makarow Awstraliýanyň gadaganlyk sanawyna ARETI Halkara nebit-gaz toparynyň,öňki “ITERA International” diýlip tanalýan şirketiň prezidenti bolandygy üçin goşuldy.
Onuň Şweýsariýada, GDA we Baltik ýurtlarynda, ABŞ-de, Kanadada, Günbatar Ýewropada we Ýakyn Gündogarda telekeçilik bähbitleri hem bölümleri bar.
2021-nji ýylyň aprelinde uly Berdimuhamedow ARETI şirketiniň goldamagynda Türkmenistanyň tebigy gaz ätiýaçlaryny öwrenýän konsorsiýumy döretmegi halkara şirketlere teklip edipdi.
2021-nji ýylyň oktiýabrynda Makarow Hazaryň türkmen ýalpaklaryny özleşdirmek babatdaky teklibini Berdimuhamedowa hödürläpdi.
Şeýlede Makarow welosiped janköýeri bolan öňki prezident bilen welosiped ýaryşlary boýunça hem hyzmatdaşlyk edipdi. Şol sanda, 2021-nji ýylda Türkmenistanda welosiped boýunça WHB-niň dünýä çempiýonaty geçirmegi hem maslahat edipdi.
Ol 11-17-nji oktiýabrda Aşgabatda geçmelidi.Emma, ýaryşlar türkmen tarapynyň haýyşy boýunça ýatyrylypdy.
Jenap Makarow Türkmenistanyň ilkinji prezidenti S.Nyýazow bilenem jebis hyzmatdaşlyk edipdi. Onuň ýolbaşçylyk eden “ITERA” Halkara şirketi türkmen tebigi gazyny Russiýa we beýleki post-sowet ýurtlaryna satmakda araçy bolupdy.
Nyýazow zamanasynda Kreml Türkmenistandan ýylda 50 milýarddan gowrak inedördül metr gaz satyn alypdy.Hatda, 90-njy ýyllaryň başlarynda Nyýazow we RF-niň ilkinji prezidenti Boris Ýelsin türkmen gazyny 25 ýyllap Russiýa akdyrmak baradaky ylalaşyga gol goýupdylar.Russiýaly Adam hukuklaryny goraýjylar bu ylalaşygy Türkmenistandaky rus raýatlaryny türkmen gazyna satmak’ diýip atlandyrypdylar.The post G.Berdimuhamedowyň maslahatçysy, ARETI şirketiniň prezidenti Igor Makarow Awstraliýanyň we Kanadanyň gadaganlyk sanawyna girizildi first appeared on Türkmenistanyň Hronikasy.