Türkmenistanyň futbol boýunça zenanlar topary 2024-nji ýylda Parižde geçiriljek Olimpiýa oýunlaryna saýlama ýaryşa ilkinji gezek gatnaşar. Aziýanyň futbol konfederasiýasynyň Kuala-Lumpurdaky (Malaýziýa) edarasynda geçirilen bije çekişlikde zenanlar toparymyzyň bäsdeşleri belli boldy. Saýlama ýaryşda Hindistanyň we Gyrgyz Respublikasynyň ýygyndylary ýurdumyzyň toparynyň bäsdeşleri boldular.
Toparlaryň 26-sy ýaryşyň birinji tapgyrynda 7 toparça bölüner.
Türkmenistan G toparçada çykyş eder.
A toparça: Özbegistan, Iordaniýa, Gündogar Timor, Butan.
B toparça: Mýanma, Eýran, Bangladeş, Maldiw adalary.
C toparça: Wýetnam, Nepal, Palestina, Owganystan.
D toparça: Tailand, Mongoliýa, Singapur, Şri-Lanka.
E toparça: Filippinler, Gonkong, Täjigistan, Pakistan.
F toparça: Taýwan, Indoneziýa, Liwan.
G toparça: Hindistan, Gyrgyz Respublikasy, Türkmenistan.
Aziýa saýlama ýaryşynyň birinji tapgyrynyň oýunlary 2023-nji ýylyň 3-11-nji aprelinde bir aýlawda merkezleşdirilen düzgünde geçiriler. Toparlaryň ählisiniň duşuşyklarynyň geçiriljek ýeri golaýda belli bolar.
Saýlama tapgyryň ikinji bölegine ýedi toparyň diňe ýeňijileri çykarlar, olara Aziýada iň ýokary görkezijili Koreýa Halk Demokratik Respublikasy, Ýaponiýa, Awstraliýa, Hytaý we Koreýa Respublikasy goşular.
Ikinji saýlama tapgyryň iň güýçli dört topary (toparlaryň üçüsiniň ýeňijisi we ikinji orunlary eýelänlerden iň güýçlüsi) üçünji saýlama tapgyrda duşuşarlar. Jemleýji tapgyrda iki jübüt toparlar öz aralarynda iki gezek öz meýdançasynda we myhmançylykda oýnarlar. Olaryň ýeňijileri Parižde 2024-nji ýylda geçiriljek Olimpiada zenanlar toparlarynyň arasynda futbol boýunça ýaryşa gatnaşmaga hukuk gazanarlar.