Ysraýyl bilen Hamasyň arasyndaky hüjümleriň bes edilmegini we taraplaryň arasynda ýesir çalşygyny maksat edinýän gepleşikler düýn Fransiýada başlady.
Ysraýylyň KAN teleýaýlymynyň berýän habaryna görä, Ysraýylyň Milli Howpsuzlyk gullugynyň başlygy Dewid Barnea, paýtagt Parižde ABŞ-nyň Merkezi razwetka gullugynyň başlygy William Burns we Kataryň Daşary işler ministri Muhammed bin Abdurrahman Al Sani bilen Tel-Awiw hökümeti bilen Hamasyň arasyndaky ýesir çalşygy gepleşikleriniň gaýtadan başlamagy üçin duşuşdy.
Habarda, Barneanyň, Burnsyň we Al Saniniň Pariždäki gepleşiklerde ýesir çalşygy meselesinde taraplary höweslendirmek üçin tagalla etjekdikleri nygtaldy.
Ysraýylyň Söweş kabinetiniň 22-nji maýda geçiren maslahatynda, Ysraýyla wekilçilik edýän gepleşik toparyna, Gaza Sektorynda hüjümleriň bes edilmegi we ýesir çalşygy şertnamasynyň baglaşylmagy üçin gepleşikleriň dowam etdirilmegi barada görkezme berlendigi habar berlipdi.
Hamasyň syýasy lideri İsmail Haniýýe, 6-njy maýda Katara we Müsüre, Gaza Sektorynda hüjümleriň bes edilmegi üçin berlen teklipleri kabul edýändigini mälim edipdi.
Hamasyň teklipleri kabul edýändigini beýan edendigine garamazdan, Ysraýylyň Söweş kabineti, Rafaha guralýan hüjümleriň dowam etdirilmegi barada karar kabul edipdi.