Duşenbe güni Aşgabatda geçirilen türkmen-eýran işewürlik maslahatynyň dowamynda Eýranyň energetika ministri Abbas Aliabadi forumyň ýokary derejede guralandygy üçin Türkmenistanyň Prezidenti Serdar Berdimuhamedowa we Türkmenistanyň Halk Maslahatynyň Başlygy Gurbanguly Berdimuhamedowa hoşallyk bildirdi.
Türkmenistanyň resmi metbugatynyň habar bermegine görä, A.Aliabadi oba hojalygynda, azyk senagatynda, enjamlaryň önümçiligi we tehniki hyzmatlary hödürlemek ulgamynda iş alyp barýan 60-dan gowrak eýran kompaniýalarynyň şu gezekki maslahata we “Iran Agrofood” atly sergisine gatnaşmagynyň özara maýa goýumlar we işewürligi giňeltmek üçin täze mümkinçilikleri açýandygyny belledi.
Energetika, ulag we üstaşyr geçirmek ýaly strategik taýdan möhüm ulgamlarda hyzmatdaşlygy ösdürmäge aýratyn üns berildi.A.Aliabadi bu ulgamlarda ylalaşyklaryň durmuşa geçirilmeginiň ýurtlaryň arasyndaky söwda dolanyşygynyň möçberlerini ep-esli artdyrjakdygyny nygtady.
Ol eýran we türkmen işewürleriniň arasynda tejribeleri alyşmak we ylalaşyklary baglaşmak üçin amatly meýdança bolup hyzmat edýän forumyň ähmiýetini belledi.Bu çäre özara gatnaşyklaryň has-da berkidilmegine ýardam eder.
Ministriň orunbasary we Eýranyň Söwdany ösdürmek guramasynyň ýolbaşçysy Mohammadali Dehgan Dehnawi öz gezeginde Türkmenistan bilen söwda-ykdysady hyzmatdaşlygy berkitmegiň möhüm ähmiýetini nygtap, medeni we taryhy umumylyga esaslanýan ikitaraplaýyn gatnaşyklaryň üstünlikli ösdürilýän sebit hyzmatdaşlygynyň aýdyň mysaly bolup durýandygyny aýtdy.
Ol şeýle hem iki ýurduň Merkezi we Günbatar Aziýada söwdany we infrastrukturalary ösdürmekde möhüm orun eýeleýändiklerini, Eýranyň we Türkmenistanyň strategik taýdan amatly çäkde ýerleşmeginiň söwda amallary we bilelikdäki taslamalar üçin täze gözýetimleri açýandygyny belledi.
Dehgan Dehnawi energetika, ulagm oba hojalyk we tehnologiýalar ulgamlarynda ikitaraplaýyn hyzmatdaşlygyň berkidilmeginiň täze iş orunlaryny döretmäge, infrastrukturalaryň işini kämilleşdirmäge we durnukly ykdysady ösüşe ýardam etjekdigini aýtdy. Ol çykyşynyň ahyrynda söwda gatnaşyklaryny we tejribeleri alyşmagy giňeltmek babatda iki ýurduň wekillerini tagallalary işjeňleşdrimäge çagyrdy.
Türkmen-eýran işewürlik maslahaty oba hojalyk toplumyndaky, hususan-da, ekerançylyk we maldarçylyk pudaklaryndaky mümkinçilikleri maslahatlaşmak üçin möhüm meýdança boldy. “Mogan” kompaniýasynyň ösüş boýunça direktory doktor Babak Azari ýurtlaryň arasynda etiniki we medeni meňzeşligiň ähmiýetini nygtady.
Munuň özi degişli ugurlarda netijeli hyzmatdaşlyga ýardam edýär. “Mogan” kompaniýasy Türkmenistana oba hojalyk ekinleriniň tohumlarynyň, nahallaryň hem-de gaýtadan işlenilen önümleriň iberilmegini teklip etmäge taýýardygyny mälim etdi.
B.Azari şu gezekki foruma gatnaşmaklygyň uzakmöhletleýin hyzmatdaşlygyň diňe başlangyjydygyny, munuň iki tarapa hem uly bähbitleri getirjekdigini belledi. Türkmenistanyň strategik taýdan amatly ýerde ýerleşendigini we onuň ykdsady kuwwatyny göz öňünde tutanyňda, bu bazarda hyzmatdaşlyk etmek agrar pudagyny we önümçilik kuwwatlyklaryny ösdürmäge çalyşýan eýran kompaniýalary üçin möhüm ädim bolup durýar.