Türkmenistanyň Halk maslahatynyň başlygy Gurbanguly Berdimuhamedow 30-31-nji maýda iş sapary bilen Tähranda boldy.
Iki ýurduň köpçülikleýin habar beriş serişdelerine görä, duşuşyklarda ýokary derejeli türkmen we eýran resmileri syýasy, ykdysady we medeni ulgamlarda hyzmatdaşlygyň dürli ugurlaryny maslahat etdi.
Taraplar energetika, daşary syýasat, gümrük gullugy, lukmançylyk we oba hojalyk pudaklarynda hyzmatdaşlygy ösdürmek barada ikitaraplaýyn resminamalara gol çekdi.
Eýranda iki milliondan gowrak etniki türkmen ýaşaýar. Ýöne, media maglumatlaryndan çen tutulsa, Türkmenistanda “türkmen halkynyň milli lideri” yglan edilen Berdimuhamedow Tährana amala aşyran saparynyň dowamynda Eýranyň türkmen ilatynyň ýüzbe-ýüz bolýan meseleleri bilen gyzyklanmady.
Azatlyk Radiosy bilen söhbetdeş bolýan eýran türkmenleriniň sözlerine görä, ýurtda ýaşaýan etniki türkmenler ýyllarboýy özleriniň medeni hukuklarynyň basgylanmagyndan, ykdysady erkinlikleriniň çäklendirilmeginden ejir çekýärler.
Etniki türkmenleri bir döwür hatda täze doglan çagalaryna türkmen adam atlaryny dakmakdan hem mahrum edildi.Eýran häkimiýetleri türkmen ilatly sebitleriň demografik gurluşyny bilkastlaýyn üýtgetmäge synanyşmakda, başga milletleriň wekillerini türkmenleriň ýaşaýan sebitlerine göçürip getirmekde, türkmenleriň ýerlerini zor bilen ellerinden almakda tankyt edildi.
Etniki türkmenler öz ene dillerini öwrenmek we öwretmek babatda çäklendirildi, türkmen dilinde çap edilýän neşirleriň ygtyýarnamalarynyň ýatyrylan halatlary boldy.
Ýöne türkmen lideri Eýrana amala aşyran saparynyň çäklerinde türkmen azlyklarynyň ýaşaýan sebitlerine baryp, eýran türkmenleri bilen duşuşyp bilmedi.