Eýranyň Baş Ştaby prezident Ebrahim Raisiniň, daşary işler ministri Hüseýin Emir Abdullahiýanyň we beýleki resmileriň ýogalan dikuçar heläkçiligi bilen bagly 2-nji derňew habarnamasyny çap etdi.
Habarnamada dikuçaryň abatlaýyş we gözegçilik derňewleriniň gözden geçirilendigi we şol ugurlar boýunça meselä gabat gelinmändigi, heläkçilikden 69 sekunda öňinçä çenli ekipaž bilen saklanan aragatnaşykda hiç hili adatdan daşary ýa-da gyssagly ýagdaýyň habar berilmändigi beýan edildi.
Dikuçaryň galyndylarynda we böleklerinde geçirilen derňewlerde we alynan nusgalarda radioelektron taýdan gatyşmaklyga ýa-da diwersiýa gabat gelinmändigi bellenen habarnamada, wakanyň esasy sebäbiniň anyklanýança çenli derňewleriň dowam etjekdigi we netijeleriniň halk köpçüligi bilen paýlaşyljakdygy habar berildi.
Eýranyň prezidenti Ebrahim Raisi 19-njy maýda Eýran-Azerbaýjan serhedindäki suw bendiniň açylyşy bilen bagly geçirilen dabara gatnaşmagyndan soň, dolanyp gelýärkä başdan geçirilen dikuçar heläkçiliginde ýogalypdy. Wakada daşary işler ministri Hüseýin Emir Abdullahiýan bilen birlikde 8 resmi aradan çykypdy.