Türkmenistanly zehinli skripkaçy Elina Gurbanowa 6 — 10-njy oktýabr aralygynda Bişkek şäherinde geçen ýaşlaryň 17-nji Delfiýa oýunlarynda üçünji orna eýe boldy.
Maýa Kulyýewa adyndaky Türkmen milli konserwatoriýasynyň ýanyndaky Ýörite sazçylyk mekdep-internatynyň 10-njy synp okuwçysy Elina Gurbanowa bürünç medala mynasyp boldy.
Skripkaçylaryň bäsleşigi iki tapgyrda geçdi. Elina birinji tapgyrda Pýer Rodeniň Kesir 18, G.Wenýawskiniň Rowaýat eserlerini hem-de D.Tartininiň sonatyny ussatlyk bilen ýerine ýetirdi we ikinji tapgyra geçmegi başardy.
Elinanyň ikinji tapgyrda ýerine ýetiren M.de Falýanyň Ispan tansy, M.Balakirýewiň Ekspromt ýaly eserleri hem eminleriň ýokary bahasyna eýe boldy.
Halkara derejeli ussat Stella Faramazowa türkmenistanly gyzyň şol ýerde çalan sazlarynyň has-da öwüşginli bolmagyna konsertmeýster hökmünde ýakyndan ýardam etdi.
Ozal hem habar berşimiz ýaly, Delfiýa oýunlarynda şekillendiriş sungaty boýunça çykyş eden türkmen ýaşlarynyň hem ýeňiş gazanandyklaryny habar beripdik. Şonda Selbi Nurýagdyýewa hem-de Wepa Ýazmyradow ýörite diplomlara hem-de sylaga eýe bolupdylar.