UEFA Çempionlar Ligasynda tapgyryň iň garaşylmadyk netijesi Lissabonda hasaba alyndy. “Mançester Siti” myhmançylykda “Sporting” bilen duşuşyp, eýýäm 4-nji minutda Fil Fodeniň goly bilen öňe saýlandy. Ýöne portugal kluby bu gola 4 gol bilen jogap berdi. 38-nji minutda ýaş ýyldyz hüjümçi Wiktor Dýokereş hasaby deňledi. 2-nji ýaryma-da 2 gol bilen başlan “Sporting” 46-njy minutda Arauhonyň goly bilen öňe saýlansa, 49-njy minutda penaltini dürs uran Dýokereş aratapawudy hasam artdyrdy.
Ol 81-nji minutda ýene bir penaltini takyk ýerine ýetirip, het-trik bilen toparyna ynamly ýeňiş getiren oýunçy boldy.Duşuşygyň 67-nji minutynda eminiň bellän penalti urgusyny Erling Holann dürs urup bilmedi. Şeýlelikde, “Mançester Siti” UEFA Çempionlar Ligasynda 27 oýundan soň esasy wagtda ýeňlişe sezewar boldy. Şol bir wagtyň özünde “Mançester Siti” topary 2018-nji ýylyň aprelinden bäri ilkinji gezek yzly-yzyna 3 duşuşykda ýeňildi.
Bu duşuşykdan öň “Mançester Siti” Liga Kubogynda “Tottenhamdan”, çempionatda “Bornmutdan” utulypdy. Şunlukda,” Mançester Sitiniň” “Premier Ligadan” soň Çempionlar Ligasynda-da ýeňlişsiz seriýasy tamamlandy.
Bu duşuşyk noýabr aýynyň ahyrlarynda “Mançester Ýunaýtediň” tälimçisi boljak Ruben Amorimiň “Sporting” klubundaky öz meýdançasynda geçiren iň soňky oýny boldy. Amorim entek “Mançester Ýunaýtediň” tälimçisi bolmanka, mankuinianlaryň garşydaşy “Mançester Sitini” ýeňmegi başardy.