Şu gün — 13-nji maýda Täjigistanyň Duşanbe şäherinde GDA gatnaşyjy döwletleriň daşary işler ministrleriniň geňeşiniň mejlisi geçirildi. Bu mejlise Türkmenistanda daşary işler ministriniň orunbasary Wepa Hajyýew gatnaşdy.
GDA-nyň resmi web saýtynda habar berlişi ýaly, nobatdaky mejlise Arkalaşyga gatnaşyjy döwletleriň daşary işler ministrleri bilen birlikde Garaşsyz Döwletleriň Arkalaşygynyň Ýerine ýetiriji komitetiniň başlygy, Ýerine ýetiriji sekretary S.Lebedew gatnaşdy.
GDA gatnaşyjy döwletleriň daşary işler ministrleriniň nobatdaky mejlisine Azerbaýjandan Jeýhun Baýramow, Ermenistandan Ararat Mirzoýan, Belarusdan Wladimir Makeý, Gazagystanda Muhtar Tleuberdi, Gyrgyzdan Žeenbek Kulubaýew, Russiýadan Sergeý Lawrow, Täjigistandan Sirojiddin Muhriddin, şeýle-de Özbegistanyň daşary işler ministriniň w.w.ý.ý Wladimir Norow gatnaşdy.
Mejlisiň dowamynda oňa gatnaşyjylar Arkalaşygyň çägindäki hyzmatdaşlygyň häzirki ýagdaýy, şeýle-de öňde durýan wajyp meseleler barada pikir alyşdylar.
Garaşsyz Döwletleriň Arkalaşygynyň nobatdaky mejlisiniň dowamynda GDA agza ýurtlaryň daşary işler ministrlikleriniň arasyndaky hyzmatdaşlygy has-da artdyrmak üçin Hereket Maksatnamasynyň ýerine ýetirilmegi, şeýle-de guramanyň çäginde daşary işler ministrleriniň arasynda köp derejeli geňeşmeler meýilnamasynyň ýerine ýetirilmegi, şol sanda bu ugurdaky ýurtlaryň özara gatnaşygy bilen baglanyşykly meseleler, şonuň bilen birlikde ylmy gözlegler, ýaşlar hyzmatdaşlygy we syýahatçylyk ugurlary boýunça pikir alşyldy.
Belläp geçsek, mejlisiň dowamynda Ýüpek ýoly halkara uniwersitetine GDA gatnaşyjy döwletleriň syýahatçylyk babatda esasy guramasy derejesi berildi.
Duşanbe şäherinde geçirilen mejlisiň dowamynda GDA giňişliginde daşary syýasatda we ynsanperwerlik ugurlarynda hyzmatdaşlygy artdyrmaga gönükdirilen birnäçe resminamalara gol çekildi.
Garaşsyz Döwletleriň Arkalaşygynyň indiki maslahatyny şu ýylyň 13-nji oktýabrynda Nur-Sultan şäherinde geçirmek meýilleşdirilýär.