Güýz pasly miwedir gök önümleriň hasylynyň has köp ýygnalýan wagty hasaplanýar. Eýsem, iň uly gök önümleriň ululygy nähiliräkkä?
Garpyz dünýäde iň köp hasyly alynýan bakja ekinleriniň biridir. Uly garpyzlaryň agramy ortaça 8-10 kilogram bolýar. Amerikaly Çri Kent atly daýhan agramy 159 kilogram bolan garpyz ösdürip ýetişdiripdir. Kent çagalygyndan bäri garpyz ösdürip ýetişdirmek bilen meşgullanýandygyny, melleginiň mes topraklydygyny aýdýar. Bu rekord 2013-nji ýylda hasaba alyndy.
Howanyň sowap başlamagy bilen limona isleg ýokarlanýar. Adatça, bir limon 55-60 gram töweregi bolýar. Ysraýylly Aharon Sehmoel 2003-nji ýylda agramy 5 kilograma, uzynlygy 74, ini 35 santimetre barabar bolan limon ösdürip ýetişdirdi. Limon ekwatora golaý bolan yssy we gurak howaly ýerlerde has gowy hasyl berýär.
ABŞ-nyň Kaliforniýa ştatynda Pätrik we Joanne Fýedler ululygy 63 santimetre barabar bolan pyrtykalyň hasylyny alýarlar. Bu rekord 2006-njy ýyldan bäri täzelenmedi.
Dürli naharlara özboluşly tagam berýän soganlar saglyk üçin hem iň peýdaly bakja ekinleriniň biri hasaplanýar.Soganlaryň dürli görnüşleri bolup, olaryň her biriniň agramy adatça 100-280 gram aralygynda bolýar.
Angliýada ýaşaýan Peter Glazebruk kiçiliginden bäri daýhançylyk bilen meşgullanýar.Ol uly bakja ekinlerini ösdürip ýetişdirmäge aýratyn üns berýär. Şonuň üçin hem, hemişe diýen ýaly ekiniň iň gowy tohumlarynyň gözleginde bolýar.
Glazebrugyň bu zähmeti netije berýär.Ol bakja ekinleriniň ululygy boýunça birnäçe rekordyň eýesidir.Glazebruk dünýäniň iň uly soganyny, ýeralmasyny we reňkli kelemini ösdürip ýetişdirýär.
Alýaskaly Skott Robbuň ösdürip ýetişdiren äpet kelemi görenleri haýran galdyrýar. Onuň agramy 60 kilogram. Kelemiň ortaça agramynyň 2-3 kilogramdygy göz öňünde tutulanda bu görkeziji örän ýokary.
Bal kädiler aşhanada has köp ulanylýan bakja ekinleriniň biridir. Gyşa durujylygy ýokary bolansoň, bol hasyly hem alynýar. Amerikaly daýhan Ron Wallesiň eken kädileriniň biriniň agramy bir tonnadan geçipdir.
Kerimberdi Ataýew,
S. A. Nyýazow adyndaky Türkmen oba hojalyk uniwersitetiniň talyby.