“France Football” žurnalynyň wersiýasyna görä, dünýäniň iň gowy futbolçysy üçin “Altyn top” baýragy indi senenama ýylynyň däl-de, möwsümiň ahyrynda gowşurylar. Bu barada L’Equipe gazetiniň saýtynda habar berilýär diýip, sportrbc.ru belleýär.
Şonuň üçin 2022-nji ýylda “Altyn top” häzirki möwsümiň ähli ýaryşlary tamamlananda, sentýabr ýa-da oktýabr aýynda gowşurylar.
Mundan başga-da, “Altyn topy” almaga dalaşgärleriň gysga sanawyny düzmek boýunça ýörite komitetde Angliýanyň çempionatynyň we “Çelsiniň” düzüminde Çempionlar ligasynyň ýeňijisi Didýe Drogba bolar. Iň gowy futbolçyny kesgitleýän emin agzalarynyň düzümi hem 100 adama çenli azaldyldy. Ses bermäge diňe FIFA-nyň reýtingindäki ilkinji 100 döwletiň wekilleriniň hukugy bolar.
Şeýle-de, ses bermek üçin ölçegler hem üýtgedildi. Esasy görkeziji oýunçynyň şahsy görkezijileri bolar, ondan soň gazanylan titullar we adalatly oýnuň ýörelgeleriniň berjaý edilmegi göz öňünde tutular. Bu ölçeglerden “oýunçynyň karýerasy” punkty aýryldy.
Geçen ýyl argentinaly Lionel Messi “Altyn topa” karýerasynda ýedinji gezek eýe boldy, ol ses berişlikde polşaly Robert Lewandowskiden we italiýaly Žoržinýodan öňe geçdi.