Dünýäniň ilatynyň ýarysy 2035-nji ýyla çenli aşa ýaglanar ýa-da semiz bolar.
Semizlige garşy göreş boýunça bütindünýä federasiýasy öňüni alyş çäreler görülmese 2035-nji ýyla çenli dünýäniň ilatynyň ýarsyndan gowragynyň aşa ýaglanjakdygyny ýa-da semiz boljakdygyny habar berdi.
TRT TSR-nyň hormatly diňleýjileri, Bilesigelijiniň bellikleri atly gepleşigimiziň nobatdaky sanynda Dünýäniň ilatynyň ýarysy 2035-nji ýyla çenli aşa ýaglanar ýa-da semiz bolar. Semizlige garşy göreş boýunça bütindünýä federasiýasy öňüni alyş çäreler görülmese 2035-nji ýyla çenli dünýäniň ilatynyň ýarsyndan gowragynyň aşa ýaglanjakdygyny ýa-da semiz boljakdygyny habar berýär atly temanyň üstünde durup geçmek isleýäris.
Saglyga zyýan ýetirjek derejede bedende aşa ýagyň ýygnalmagy hökmünde häsýetlendirilen semizlik keseli, döwrebap dünýämiziň iň uly saglygy goraýyş meseleleriniň biri hökmünde öň hatara çykýar.
Bütindünýä Saglygy goraýyş guramasynyň berýän habaryna görä, dünýä derejesinde 1 milliartdan gowrak adam aşa ýagly ýa-da semiz hökmünde hasaplanýar. Şolaryň 650 milliony uly ýaşlylardan, 340 milliony ýetginjeklerden we ýaşlardan, 39 milliony çagalardan ybarat. Her 7 erkegiň 1-i her 5 zenanyň hem 1-i semizlige garşy göreş alyp barýar.
Semiz adamlaryň sany günsaýyn artýar, Semizlige garşy göreş boýunça bütindünýä federasiýasy tarapyndan çap edilen habarnamalar, aşa ýaglanan ýa-da semizlige garşy göreş alyp barýanlaryň sanynyň 2035-nji ýylda 4 milliard adamdan geşjekdigini görkezýär.
ABŞ, Hytaý, Braziliýa, Hindistan we Russiýa ýaly ýurtlarda hasaba alynan semiz adamlaryň sany bütin dünýädäki semizlik hadyslarynyň takmynan 1/3-ini emele getirýär.
Ýürek, böwrek, bagyr we köpeliş organlaryna ýaramaz täsir ýetirýän semizlik süýji keseli, ýürek-damar keselleri, gipertoniýa, insult we dürli rak kesellerine sebäp bolup adamyň jan-saglygyna howp salýar.
Aýallaryň arasynda semizlik derejesi iň ýokary bolan ýurt Tonga
Semizlik zenanlarda has köp gabat gelinýär.
Aýallaryň arasynda semizlik derejesi iň ýokary bolan ýurt 82,8 göterim bilen Günorta Ýuwaş okeanyndaky Tonga döwletidir.
Şonuň bilen birlikde Kuweýt, Müsür we Liwiýa ýaly ýurtlar Gündogar Ortaýer deňizinde zenanlaryň arasynda semizligiň iň ýokary bolan ýurtlaryň arasynda öňe hatara çykýar.
Ýewropada bolsa Rumyniýa, Gresiýa, Latwiýa we Portugaliýa zenanlaryň arasynda semizlik derejesi iň ýokary bolan ýurtlar hökmünde öň hatara çykýar.
Türkiyede bolsa aşa ýaglanma ýa-da semizlige garşy göreş alyp barýan zenanlaryň derejesi 30,3 göterimdir.
Ozallar diňe ösen ýurtlarda gabat gelinen bir saglygy goraýyş meselesi bolan semizlik, şu günki gün az we orta girdejili ýurtlarda hem artýar.
Görkezijiler, öňümizdäki ýyllarda semizlik hadysalarynyň artjak ýurtlaryň 10-dan 9-synyň Aziýada we Afrikada ýerleşýän az ösen ýurtlar boljakdygyny görkezýär.
Halkara jemgyýet tiz depginler bilen artýan şol ýurtlarda semizlik keseline garşy göreşiniň ýeterlik derejede däldigine ünsleri çekýär.
Semizlige garşy göreş boýunça bütindünýä federasiýasy tarapyndan çap edilen habarnama görä, semizlik keseliniň çykdajysynyň 2035-nji ýyla çenli 4 trillion dollardan gowrak boljakdygy çak edilýär.
Eziz ildeşler Bilesigelijiniň Bellikler atly gepleşigimiziň bu günki sanynda bolsa dünýädäki semizlik görkezijileriniň üstünde durup geçdik.