Ýelizaweta II portreti auksiona çykaryldy. Meşhur estrada aýdymçysy Maýkl Jekson tarapyndan çekilen merhum britan Şa zenany Ýelizaweta II portreti auksiona çykaryldy. Portrete 10 müň dollar baha kesildi. Auksion 3-nji awgustda meýilleşdirilýär we girdejiniň bir bölegi haýyr-sahawata gönükdiriler.
Dünýäniň iň meşhur moda brendi. Lyst seljeriş platformasy 2024-nji ýylyň ikinji çärýeginiň jemi boýunça iň meşhur moda brendleriniň sanawyny hödürledi. Birinji orny Loewe ispan markasy eýeledi. Ol bu babatda Italiýanyň Miu Miu brendinden öňe geçdi. Liderleriň üçlügine Prada hem girdi. Ilkinji bäşligi Saint Laurent we Bottega Veneta brendleri jemledi.
Öküz uruşlary gadagan ediler. Kolumbiýanyň Prezidenti Gustawo Petro 2027-nji ýyldan başlap, ýurtda öküz uruşdyrmagy gadagan edýän kanuna gol çekdi. Parlament tarapyndan makullanan kanunda öküz uruşlaryny doly ýatyrmaga çenli üç ýyllyk geçiş möhleti göz öňünde tutulan. Bu wagtyň dowamynda öküz uruşlaryny geçirmäge rugsat berler.
Dünýäniň iň gözel zenany. 28 ýaşly amerikan-britan aktrisasy Anýa Teýlor-Joý altyn kesgitleme düzgünleri boýunça dünýäde iň owadan zenan diýlip yglan edildi. Britaniýaly plastiki hirurg Julian de Silwa şeýle netijä geldi. Teýlor-Joý ýüzüniň ähli bölekleri fiziki kämillik nukdaýnazaryndan ölçenende, ýeňiji boldy diýip, lukman belledi.
Maradonanyň köýnekçesi auksionda. Argentinaly Diego Maradonanyň 1986-njy ýylda geçirilen Dünýä kubogynyň ýarym final oýnunda geýen köýnekçesi Sotheby’s auksionyna çykaryldy. Lotuň başlangyç bahasy 700 müň dollar. Auksion öýüniň hasaby boýunça, köýnekçäniň bahasy 800 müň 1,2 million dollar aralygynda bolar.
70 ýaşynda diplom aldy. Malaýziýaly Toh Hong-Keng 70 ýaşynda lukmançylyk diplomyny aldy. Ol Filippinleriň PHINMA uniwersitetini tamamlady. Onuň haýsy hünär ugruny gutarandygy görkezilmeýär. Golaýda uçurym bolan Hong-Keng Sebu şäherindäki uniwersitete 2019-njy ýylda, 66 ýaşyndaka kabul edilen eken.
Topragyň gatlaklaryny berkider. Permiň milli barlag politehniki uniwersitetiniň (Russiýa) barlagçylary soda önümçiliginiň galyndylaryny kalsiý karbonatynyň külkesini ulanyp, ulag ýollarynyň toprak gatlaklaryny berkitmegiň usulyny oýlap tapdylar. Bilermenler bu usulyň ýol gurluşygynyň çykdajylaryny azaltjakdygyny aýdýarlar.
Marsohod açyş etdi. 2012-nji ýyldan bäri Gyzyl planetany öwrenýän Curiosity marsohody garaşylmadyk açyş etdi. Sulfata baý sebiti gözläp ýörkä, Curiosity tötänden bir daşy döwdi we onuň içinde sary arassa kükürt kristallarynyň üýşmegini ýüze çykardy diýip, NASA-nyň Reaktiw hereket barlaghanasy habar berýär.
Kindiwanja dron döredildi. Niderlandlardaky Delft tehniki uniwersitetiniň alymlary kindiwanja drony döretdiler. CrazyFlie dronynyň agramy 56 gram bolup, olarda garynjalaryň ugur kesgitleýiş ukybyna meňzeýän nawigasion ulgam bar. Şeýle dronlar ammarlara gözegçilik etmek, gaz syzyşlaryny tapmak ýaly işlerde ulanylyp bilner.