FIFA ýene-de 2 aý gowrak wagtdan Russiýada geçiriljek futbol boýunça 21-nji Dünýä Kubogy ýaryşynda jürlewük çaljak baş eminleriň we olara ýardam berjek kömekçi eminleriň sanawyny mälim etdi. Şoňa görä, FIFA-nyň garamagyndaky 7 konfederasiýadan 36 baş emin (ozalky çempionatlara 2025 baş emin çagyrylýardy) hem-de 63 kömekçi emin Dünýä çempionatynda çykyş eder.
Baş eminler 35 döwletden bolup, ABŞ-nyň adyndan 2 emin jürlewük çalar.Umumylykda kömekçi eminleri-de hasaba alsaň, 46 döwletiň wekili bu futbol baýramçylygyna gatnaşar.UEFA-dan 10, Afrikadyr Aziýadan, Demirgazyk we Günorta Amerikadan 6 hem-de Okeaniýadan 2 emin oýunlara eminlik eder. Şolaryň arasynda 9 oýun bilen Dünýä çempionatlarynda iň köp duşuşykda jürlewük çalan özbegistanly Rawşan Irmatow hem-de salwadorly Hoel Agilar 3-nji gezek Dünýä Kubogyna çagyryldy. Ýagny Irmatow bilen Agilar 2010 we 2014-nji ýyllardaky çempionatlarda-da eminlik edipdi. Şeýle-de bu çempionat bahreýnli Nawaf Şukrallanyň, gambiýaly Bakari Gassamanyň, amerikaly Mark Geýgeriň, argentinaly Nestor Pitananyň, braziliýaly Sandro Riççiniň, kolumbiýaly Wilmar Roldanyň, germaniýaly Feliks Bryhyň, türkiýeli Jüneýt Çakyryň, gollandiýaly Býorn Kýoýpersiň hem-de serbiýaly Milorad Mažiçiň Braziliýa 2014-den soň, 2-nji Dünýä Kubogy synanyşygy bolar. 24 emin bolsa, ilkinji gezek Dünýä çempionatyna gatnaşar.
Eminleriň iň ýaşy ulusy serbiýaly Milorad Mažiç bolup, ol mart aýynyň 23-ine 45 ýaşyny doldurypdy.Iň ýaş emin bolsa, Kosta rikaly Rikardo Monterodyr.Ol mart aýynyň 6-synda 32 ýaşy arka atdy.
Bu ýylky eminleriň arasynda futbolyň watany Angliýadan ýeke eminiň ýokdugy-da aýratyn bellärliklidir. Şeýle-de çempionatda ilkinji gezek jedelli pursatlarda Wideo Asistent Emin (VAR) ulgamyndan hem peýdalanylar.