“Uly ýigrimiligiň” sammiti. “Uly ýigrimiligiň” (G20) saglygy goraýyş ministrleri 19-njy aprelde wideokonferensiýa arkaly maslahat geçirmegi meýilleşdirýärler. Onuň çäklerinde taraplar halkara meselelerini maslahatlaşarlar. Şeýle hem, G20-iň saglygy goraýyş ministrlikleriniň ýolbaşçylary dünýäniň saglygy goraýyş pudagynyň işlerini has-da ilerletmegiň meseleleri barada pikir alşarlar. Maslahata Bütindünýä Saglygy Goraýyş guramasynyň we Bütindünýä bankynyň wekilleriniň goşuljakdygy habar berilýär.
Demokratik partiýa ýeňiş gazandy. 15-nji aprelde “Toburo” Demokratik partiýasynyň ýolbaşçylygyndaky dolandyryjy topar Koreýa Respublikasynyň Milli Assambleýasyna geçirilen saýlawlarda ýeňiş gazandy.Saýlaw býulletenleri doly sanalandan soň, dolandyryjy toparyň Milli mejlisde jemi 179 orny (Milli mejlisiň düzüminiň 60,9%-ine deň) eýeländigi belli boldy.
Häkimiýet başyndaky partiýa soňky 16 ýylda ilkinji gezek parlamentdäki orunlaryň aglaba köplügine eýe boldy.Birleşen partiýanyň ýolbaşçylygyndaky garşy topar 101 orna eýe boldy (Milli mejlisiň düzüminiň 34,4%-ine deň).
Merkezi saýlaw topary saýlawçylaryň sanynyň 66,2%-ine deň bolup, munuň soňky 28 ýylda iň uly gatnaşykdygyny habar berdi.
Bütindünýä bankynyň goldawy. Bütindünýä banky öňümizdäki birnäçe aýyň dowamynda ykdysadyýeti dikeltmek we telekeçileri goldamak maksady bilen ösüp barýan ýurtlaryň hökümetlerine we kompaniýalaryna 160 milliard dollar bölüp berer. Bu barada Bütindünýä bankynyň Ýerine ýetiriji direktorlar geňeşi habar berdi. Jemi 2 milliard dollarlyk ilkinji ýardam 25 ýurdy, soňraky taslamalar bolsa, ýene 40 ýurdy öz içine alýar.
Mundan başga-da, bank toparlary bar bolan taslamalardan 1,7 milliard dollar möçberinde serişdeleri geçirmegiň üstünde işleýärler.
Welosiped ýaryşy geçiriler. “Giro d’Italia” atly köp günlük welosiped ýaryşynyň 2020-nji ýylyň oktýabr aýynda geçirilmegi meýilleşdirilýär. Bu barada Italiýanyň welosiped federasiýasynyň prezidenti Renato di Rokko habar berdi. Maksadymyz oktýabr aýynda “Giro d’Italia”-ny geçirmek diýip, ol belledi.
“Amazon” işgär alýar.Amerikan söwda kompaniýasy “Amazon” ýene-de 75 müň işgär alar.Onlaýn bölek satyjy, soňky wagtlar sargytlaryň sanynyň köpelmegi bilen ýüzbe-ýüz boldy.
Golaýda “Amazon” 100 müň adamyň işe alynjakdygyny mälim edipdi, ýöne basym bu boş ýerleriň hemmesiniň dolanlygy belli bolansoň, ýene-de işgärlere zerurlyk ýüze çykdy.Elektron söwdasyny amala aşyrýan bu kompaniýa 1994-nji ýylda Jeff Bezos tarapyndan onlaýn kitap dükany hökmünde esaslandyryldy.
Soňra iş gerimini giňeldip, audio kitaplar (ýükläp almak arkaly), wideo oýunlar, elektronika, egin-eşik, mebel, iýmit, oýunjaklar we şaý-sepler ýaly zerurlyklary satyp başlady.
25 million tomaşaçy. 12-nji aprelde italiýaly aýdymçy Andrea Boçelli Pasha baýramynda Milan soborynda konsert berdi.Onuň konsertine bir günüň içinde onlaýn wideo arkaly 25 milliondan gowrak adam tomaşa etdi.
Organ çalýan sazandar Emanuele Wianelli aýdymça sazandarlyk etdi.Boçelli “Umyt sazy” atly konsertinde Şubertiň “Awi Mariýa” we Maskaniniň “Sankta Mariýa” ýaly sazlaryny ýerine ýetirdi.Boçelli italýan aýdymçysy, nusgawy we meşhur sazlary ýerine ýetirijidir. Şeýle hem, ony opera sazlarynyň ussady hökmünde giňden tanaýarlar.
Aýdan peýdalanmagy maksat edinýär.ABŞ-nyň Prezidenti Donald Tramp Aýda we geljekde beýleki asman jisimlerinde hem magdan gazyp almak hem-de tebigy gorlaryny peýdalanmak bilen meşgullanmaga mümkinçilik berýän karara gol çekdi.
Oňa laýyklykda, ABŞ-nyň Döwlet Departamentine hem-de häkimiýetiň beýleki edaralaryna resminamany halkara derejesinde ara alyp maslahatlaşmak we dürli eýeçilik kompaniýalary bilen Aýdaky, şeýle hem beýleki asman jisimlerindäki gorlardan peýdalanmak baradaky şertnamalary baglaşmak üçin ýarym ýyl wagt berildi.