Golaýda Nebit eksport edýän ýurtlaryň guramasynyň (OPEK) agzalary we bileleşige girmeýän döwletler Awstriýanyň paýtagty Wenada geçirilen maslahatda her gije-gündizde nebitiň çykarylyşyny 1 million barrele ýetirmek hakynda ylalaşdylar.
Maslahata OPEK-iň 24 ýurdundan başga-da Müsüriň, Çadyň, Günorta Afrika Respublikasynyň we Ugandanyň wekilleri gatnaşdylar. Ýöne käbir bilermenler öňümizdäki alty aýyň dowamynda nebitiň çykarylyşynyň mukdarynyň bir gije-gündizde 600-700 müň barrele ýetjekdigini çak edýärler.
Çehiýanyň Prezidenti Miloş Zeman Premýer-ministr Andreý Babişiň ýolbaşçylygyndaky täze hökümetiň düzümini tassyklady. Täze dolandyryjy bileleşik parlamentde 200 mandatdan 93-sine eýe. Ol Çehiýanyň we Morawiýanyň kommunistik partiýasynyň 15 deputatlary bilen öz syýasatyny alyp barar. Premýer-ministr Andreý Babiş raýatlaryň howpsuzlygyny üpjün etmek esasy maksatlarynyň biri boljakdygyny habar berdi.
Madagaskarda şu ýylyň 7-nji noýabrynda Prezident saýlawlary geçiriler. Bu barada ýurduň Premýer-ministri Kristian Ntsaýyň hökümet ýygnagyndan soňra öz resmi saýtynda ýaýradan beýanatynda mälim edilýär. Onda ähli syýasy toparlar Prezident saýlawlarynyň durnukly geçirilmegine ýardam bermäge çagyrylýar. Eger-de saýlawlaryň birinji tapgyrynda dalaşgärleriň hiç birisi ýeňiş gazanyp bilmese, onda ikinji tapgyr 19-njy dekabrda geçiriler.
Iýun aýynyň 28-30-y aralygynda Özbegistanyň Samarkant şäherinde ilkinji gezek Merkezi Aziýanyň ýaşlarynyň maslahaty geçirildi.Maslahatda sebitiň umumy mümkinçilikleriniň ösüşinde ýaşlaryň orny, sebit ýurtlarynyň ýaşlar guramalarynyň we edaralarynyň özara hyzmatdaşlygynyň amaly ugurlary we sebitiň beýleki meseleleri ara alnyp maslahatlaşyldy.
Bu çärä Gazagystandan, Gyrgyzystandan, Täjigistandan, Türkmenistandan, Özbegistandan wekiller, şeýle hem HHR-den we Russiýa Federasiýasyndan myhmanlar gatnaşdylar.
Üç ýarym ýyllyk uçuşdan soň, ýapon kosmos zondy “Haýabusa2” (Laçyn2) Rýug asteroidine baryp ýetdi.Kosmos enjamynyň 27-nji iýunda ýerli wagt bilen sagat 09:35-de Rýug asteroidiniň 20 kilometr uzaklygyndaky gözegçilik nokadyna üstünlikli baryp ýetendigini ýapon aerokosmos agentligi habar berdi.
Bellenilen meýilnama boýunça enjam birnäçe wagtyň dowamynda gözegçilik işlerini amala aşyryp, oktýabr aýynda ilkinji gezek asteroide gonar we onuň topragyny alar.Enjam 2020-nji ýylda Ýere dolanar.
12 ýaşly fransiýaly oglanjyk Tom Goron bir adamlyk ýelkende La-Manşany geçip, täze rekord goýdy. Ol Angliýanyň Uýat adasyndan deňze çykyp, Fransiýanyň Şerbur şäherine çenli 100 kilometr aralygy 14 sagat 20 minutda geçmegi başardy. Tomuň kakasy öz ýeňil gämisinden syýahatçy ogluna ätiýaçdan ötri gözegçilik edipdir, ýöne oglanjyk ähli kynçylyklara döz gelip, bir özi kenara ýetmegi başarypdyr.
Hytaýyň günortasynda dünýäniň iň uzyn aýna köprüsi açyldy. 200 metr uzynlykdaky köpri uçudyň üstünden birnäçe metr belentlikde ýerleşip, gözegçilik meýdany bilen tamamlanýar.Aýnanyň dury saklanmagy üçin bu ýere gelýänleri ýörite niýetlenen aýakgaplarda goýberýärler.
Geçen mart aýynda hem şunuň ýaly köpri Hytaýyň Syçuan welaýatynyň daglyk seýilgähleriniň birinde deňiz derejesinden 1980 metr belentlikde ýerleşýän iň beýik aýna köpri ulanmaga berlipdi.