Dag gerşine çykar.Gyrgyz Respublikasynyň Prezidenti Sadyr Japarow ÝUNESKO-nyň başlygy Odre Azulaýy ýurtdaky buzluklaryň ýagdaýy bilen tanyşmaga çagyrdy.Bu barada Gyrgyz Respublikasynyň Prezidentiniň metbugat gullugy habar berdi. 2006-njy ýylda ÝUNESKO diýlip at berlen belentlik Merkezi Týan-Şanda ýerleşýän Sary-Jaz dag gerşiniň bir bölegidir.
Onuň belentligi 5063 metre deň.Odre Azulaý şu ýyl ýurda baryp görmek baradaky çakylygy kabul etdi we saparyny daga çykmak bilen utgaşdyrmagy makullady.
Kanaly giňeltmek meýilleşdirilýär.Sues kanalynyň administrasiýasynyň başlygy Osama Rabia, gämi kanalyny giňeltmegiň mümkinçilikleriniň öwrenilýändigini aýtdy.Ortaýer deňzi bilen Gyzyl deňzini birleşdirýän Sues kanalynyň umumy uzynlygy häzirki wagtda 193,3 kilometre, çuňlugy 24 metre deň bolup, dünýädäki iň uly gämilere, şol sanda nebit tankerlerine geçmäge mümkinçilik berýär.
Sues kanaly 1869-njy ýylyň 17-nji noýabrynda ýük daşamak üçin açyldy.Port-Said we Sues onuň esasy portlarydyr.
Stiw Jobsuň anketasy satyldy.Charterfields kompaniýasynyň auksionynda Apple-iň esaslandyryjysy Stiw Jobsuň işe ýerleşmek üçin dolduran anketasy satyldy.Näbelli alyjy onuň üçin 162 müň funt (takmynan 222 müň dollar) töledi.
Geljekki milliarderiň 1973-nji ýylda galam bilen doldurylan anketasynda kompýuterler we kalkulýatorlar bilen işlemekde tejribesiniň bardygy ýazylypdyr. 1974-nji ýylda Jobs Atari kompaniýasyndan iş tapýar.Ol iki ýyldan soň Apple-i esaslandyrýar.
Ykdysadyýeti öser.Bütindünýä banky 2021-nji we 2022-nji ýyllarda Russiýanyň ykdysadyýetiniň ösüşi baradaky çaklamany täzeden gözden geçirdi.Halkara maliýe guramasynyň çaklamalaryna görä, şu ýyl ösüş 2,9 göterim bolup biler.
Pandemiýanyň ykdysadyýete täsiri kem-kemden azalýarka ösüşiň 3,2 göterime çenli artmagy bilen 2022-nji ýylda dikelişe garaşylýar diýlip beýanatda bellenilýär. Ýanwar aýynda Ykdysady ösüş ministrliginde Russiýanyň ykdysadyýetiniň şu ýyl 2,6 göterim, indiki ýyl bolsa 3 göterim ösjekdigi bellenipdi.
Sport arkaly bilim boýunça sammit. 3-6-njy aprel aralygynda Marokkoda we birnäçe Afrika ýurtlarynda sport arkaly bilim boýunça birinji sammit guraldy.Bu sammit sporty ösüp barýan ýurtlar üçin zerurlyga öwürmegi maksat edinýär.
Maslahatda bilimi, ykdysady we sosial integrasiýany, mümkinçilikleriň deňligini we durnukly ösüşi üpjün ediji hökmünde sporty ösdürmäge ähli milli, sebit we global edaralaryň tagallalarynyň birikdirilmegine çagyryş edildi.
Arheologlaryň täze açyşy.Türkiýede arheologlar grek we rim döwürlerinde Smyrna şäherini gurluşyk materiallary bilen üpjün etmek üçin işjeň ulanylan daş karýerini tapdylar.Bu ýer Izmir şäherinden tapylyp, dört ýyllap geçirilen gazuw-agtaryş işleriniň netijesi boldy.
Gazuw-agtaryş işleriniň ýolbaşçysy Akin Ersoýyň pikiriçe, gadymy döwürde Smyrna şäheri şu ýerde ýerleşip, ýadygärlikleri bilen meşhur bolupdyr.Indi arheologlar onuň bir syryny açdylar.Olar gadymy şäheri meýilleşdirijileriň gurluşyk üçin daşlary nireden alandyklaryna göz ýetirdiler.
Wideo oýun kartriji satyldy.ABŞ-nyň Heritage auksionynda wideo oýun kartriji Super Mario Bros satyldy.Onuň üçin alyjy rekord mukdarda 660 müň dollar goýdy.Bu barada auksion öýüniň beýanatynda aýdylýar.
Onuň bahasy öňki rekordy täzeledi. 2020-nji ýylda näbelli bir alyjy Super Mario Bros-yň nusgasy üçin 114 müň dollar töläpdi.Satylan kartrij abat saklanypdyr.Habar beriş serişdeleri wideo oýnunyň Täze ýyl sowgady hökmünde satyn alnandygyny habar berdiler.
Gowakdan tapylan yzlar.Wýetnamyň Arheologiýa institutynyň işgärleri ýurduň demirgazygyndaky Doý gowagynda barlag geçirip, takmynan, 10 müň ýyl mundan ozal bu ýerde ýaşap geçen adamlaryň yzlaryny tapdylar.
Takmynan, 200 inedördül metr meýdany öz içine alýan gowagyň içinde alymlar dürli adam yzlaryny ýüze çykardylar.Alnan netijeler has giňişleýin gözlegler üçin möhümdir. Çünki bu açyş sebitiň ilatynyň taryhyna täze sahypa açýar diýip, Ninbin welaýatynyň häkimliginiň medeniýet we sport bölüminiň müdiriniň orunbasary Nguen Kao Tan aýtdy.
The post Dünýä habarlary gysga setirlerde appeared first on Zaman Türkmenistan.