Moto GP boýunça möwsümiň 11-nji bäsleşigi Awstriýada geçirildi.Spilberg şäherindäki 4,3 kilometrlik “Red Bull” trassasynda guralan ýaryşda “Dukati” toparynyň italýan sürüjisi Andrea Dowizioso ýeňiji boldy.
Ol 28 aýlawy 39 minut 43,323 sekuntda tamamlap, bu ýylky 3-nji, karýerasyndaky 5-nji ýeňşini gazandy.Dowiziosodan 0,176 sekunt soň pellehanadan geçen Mark Markes 2-nji ýeri eýeledi. “Repsol Hondanyň” ispaniýaly sürüjisi bäsleşige ilkinji hatardan başlap, ol soňuna çenli ýiti göreş alyp bardy. Ýaryşyň ýeňijisinden 2,661 sekunt yza galan “Repsol Hondanyň” başga bir ispan piloty Dani Pedrosa 3-nji orna mynasyp boldy.
Awstriýa “Gran Prisinden” soň utugyny 158-e ýetiren Dowizioso sanawyň lideri Markes bilen utuk aratapawudyny 16-a düşürdi. 3-nji hatarda 150 utukly Mawerik Winýales barýar.Möwsümiň indiki ýaryşy 27-nji awgustda Beýik Britaniýada geçiriler.