Şu günler Türkmenistanda güýzlük bugdaý ekişi dowam edýär. Kärendeçi daýhanlar dizel ýangyjynyň ýetmezçiliginiň Balkanyň käbir sebitlerinde ekiş möwsümini bökdeýändigini aýdýarlar. Bu barada Azatlyk Radiosynyň habarçysy 6-njy oktýabrda sebitden habar berdi. Motor ýangyjynyň ýetmezçiligi ilatyň gündelik durmuşyna oňaýsyz täsir edýär.
Türkmenistanda güýzlük bugdaý ekişini geçirmegiň tertibine laýyklykda, ekiş möwsümi ýurduň Ahal, Balkan, Lebap we Mary welaýatlarynda 15-nji sentýabr 30-njy noýabr aralygy, Daşoguz welaýatynda 25-nji awgust 25-nji oktýabr aralygy hasaplanylýar.
Azatlyk Radiosynyň habarçysy Balkan welaýatynyň Bereket, Magtymguly we Serdar etraplaryndaky tehnikalara hyzmat ediş kärhanalarynda dizel ýangyjynyň ýetmezçiligi sebäpli ekiş möwsüminiň bökdelýändigini habar berýär.
Azatlygyň habarçysyna görä, sebitde ýangyç gytçylygy geçen hepde başlandy we ekişe gatnaşýan tehnikalaryň dizel üpjünçiliginde kynçylyk ýüze çykdy.
“Sürüme gatnaşýan traktorlaryň diňe 10 göterimi dizel ýangyjy bilen üpjün edilýär” diýip, Azatlyk Radiosynyň habarçysy sebitden habar berýär.
Türkmenistanyň döwlet metbugaty üstümizdäki ekiş möwsüminde ähli agrotehniki kadalaryň berjaý edilýändigini öňe sürýär.
Balkan welaýatynyň häkimi Taňryguly Atahallyýew 3-nji oktýabrda geçirilen hökümet mejlisinde beren hasabatynda sebitde alnyp barylýan ekiş işlerinde “oba hojalyk tehnikalaryndan netijeli peýdalanylýandygyny hem-de bugdaý ekilen meýdanlara gögeriş suwunyň öz wagtynda tutulýandygyny” aýtdy.
Ýöne Azatlyk Radiosynyň habarçysy bilen gürrüňdeş bolan ýerli gallaçylar we mehanizatorlar ýangyç gytçylygy zerarly ekiş möwsüminde tehnikalaryň diňe ujypsyz böleginden peýdalanmaga mümkinçilikleriniň bardygyny aýdýarlar.
“Oba hojalyk işlerinde ulanylýan ýük ulaglarynyň sürüjileri dizel ýetmezçiligi sebäpli dynç alyş rugsadyna iberildi” diýip, bir mehanizator howpsuzlyk ýagdaýlary sebäpli atlandyrylmazlyk şerti bilen Azatlyk Radiosynyň habarçysyna gürrüň berdi.
Üstümizdäki ekiş möwsüminde Türkmenistanda 690 müň gektara bugdaý ekilýär. Öňümizdäki hasyl möwsüminde ýurt boýunça 1 million 400 müň tonna bugdaý hasylyny ýygnap almak meýilleşdirilýär.
Gallaçy kärendeçiler Ahal welaýatynda 400 müň, Mary welaýatynda 345 müň, Lebap welaýatynda 310 müň, Daşoguz welaýatynda 265 müň we Balkan welaýatynda 80 müň tonna däne hasylyny ýygnamagy maksat edinýärler.
Türkmenistanda döwlet tabşyrygyna girýän esasy ekinleriň bugdaýyň we gowaçanyň ekişine döwlet derejesinde badalga berilýär. Ekiş we hasyl möwsümleri döwlet baştutany tarapyndan yglan edilýär.
Dowma edýän güýzlük bugdaý ekişine 2-nji sentýabrda badalga berildi.
Bu aralykda, ýurduň dürli sebitlerinde soňky bir hepde bäri motor ýangyjynyň ýetmezçiligi dowam edýär. Biraz öň, Azatlygyň habarçylary oktýabaryň ilkinji günlerinde Mary we Lebap welaýatlarynda benzin gytçylygynyň emele gelendigini habar berdiler.
Balkan sebitindäki habarçymyz ýangyç gytçylygynyň diňe bir oba hojalyk işlerine däl, eýsem durmuşyň beýleki ugurlaryna-da oňaýsyz täsir edýändigini habar berýär.
“Balkanabatda 5 manatlyk taksileriň bahasy 10 manada çykdy. Taksi sürüjileri 10 litr benzin satyn almak üçin 3 sagat ýangyç guýujy beketlerde nobata garaşmaly bolýarlar” diýip, habarçymyz aýdýar.
Galyberse-de, Azatlygyň habarçysy ýangyç guýujy beketlerde ýüzlerçe ulagdan ybarat uly nobatlaryň emele gelendigini habar berýär. Onuň maglumatlaryna görä, ýangyç guýujy beketlerde ulaglara satylýan ýangyjyň möçberi çäklendirilýär.
“Tiz kömek ulaglaryna öňler gündelik 20 litr benzin berilýärdi, indi şol 10 litre düşürildi” diýip, bir ýangyç stansiýasynyň işçisi Azatlyk Radiosynyň habarçysy bilen gürrüňdeşlikde aýtdy.
Şeýle-de, habarçy ýangyç ýetmezçiligi sebäpli etrap ýerlerinde tiz kömek ulaglarynyň hereketiniň bökdelýändigini aýdýar.
Azatlyk Radiosy Balkan welaýatynda dowam edýän ýangyç gytçylygy we ekiş möwsüminiň barşy barada sebit häkimliginden kommentariý alyp bilmedi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.