15-16-njy iýulda Aşgabat şäheriniň sport we ýaşlar syýasaty Baş müdirliginiň Ýöriteleşdirilen küşt we şaşka mekdebinde ýurdumyzda ýerleşýän ilçihanalaryň hem-de halkara guramalarynyň wekilleriniň we olaryň maşgala agzalarynyň gatnaşmagynda küşt ýaryşy geçirildi. Küşt ýaryşyny Türkmenistanyň Daşary işler ministrligi, Hindistanyň ýurdumyzdaky ilçihanasy hem-de Türkmenistanyň Küşt federasiýasy bilen bilelikde gurady.
Gyzykly çäräniň 28-nji iýul — 10-njy awgust aralygynda Hindistanyň Çennaý şäherinde geçiriljek 44-nji Bütindünýä küşt olimpiadasynyň hem-de FIDE-niň Kongresiniň bosagasynda geçirilmeginiň özboluşly manysy bardyr.
Bu barada ýaryşyň açylyş dabarasynda edilen çykyşlarda hem bellenildi.Ilki bilen Hindistanyň Türkmenistandaky ilçisi doktor Widhu Pithambaran Nairiň gutlag sözi diňlenildi.Soňra Türkmenistanyň Sport we ýaşlar syýasaty ministrliginiň, ýurdumyzyň Daşary işler ministrliginiň hem-de Türkmenistanyň Küşt federasiýasynyň wekilleriniň çykyşlaryna orun berildi.
Wideoaragatnaşyk arkaly edilen çykyşlar hem açylyş dabarasyna gatnaşyjylaryň üns merkezinde jemlendi.
Küşt boýunça Türkmenistanyň ýygyndy toparynyň agzalarynyň 44-nji Bütindünýä küşt olimpiadasynda geýjek resmi eşikleriniň görkezilşinden soň ýaryşlara badalga berildi. Şweýsar ulgamy boýunça 7 tapgyrda geçirilen ýaryşa, Aşgabatdaky diplomatik wekilhanalaryň hem-de halkara guramalaryň onlarçasyndan küşt söýüjileriň 30-dan gowragy gatnaşdy. Ýeňijiler dürli ugurlar boýunça kesgitlenildi.
Oňa diplomatlardan hem-de halkara guramalaryň wekillerinden başga-da hemaýatkärleriň agzalary gatnaşdylar. Ýaryşyň absolýut ýeňijisi, zenanlaryň ýaryşynyň çempiony, gyzjagazlaryň hem-de oglanjyklaryň bäsleşiginde tapawutlananlar we toparlaýyn ýeňijiler ýapylyş dabarasynda sylaglanyldy.
Umumy hasapda doly derejeli netijäni mümkin bolan 7 utugyň 7-sini hem gazanmagy Türkmenistanyň DIM-niň Halkara gatnaşyklary institutynyň 4-nji ýyl talyby Annagözel Mekanowa başardy.Ondan 2 utuk yza galan küştçüleriň bäşisi degişlilikde 2-nji we 6-njy orunlary paýlaşdylar.
Goşmaça görkezijiler boýunça geljekki diplomat Azym Ýangibaýew kümüş baýragyň eýesi boldy.HIL-TM kompaniýasynyň wekili Isaguly Rzagulyýew üçünji orna mynasyp boldy.Ermenistanyň ilçihanasynyň diplomaty Arşak Geworkýan, ABŞ-nyň ilçihanasynyň diplomaty Braýan Dewis we Hindistanyň ilçihanasynyň konsuly Sunil Raj Kumar Mallapragada güýçlüleriň altylygyna girdiler.
Zenanlaryň ýaryşynda Türkmenistanyň DIM-niň Halkara gatnaşyklary institutynyň talyp gyzlary Akgözel Rasulowa hem-de Bahar Çoganowa degişlilikde 1-nji we 2-nji orunlary, BMG-niň Öňüni alyş diplomatiýasy boýunça sebit merkeziniň işgäri Elina Larina bolsa 3-nji orna mynasyp boldy.
Toparlaýyn bäsleşikde BMG-niň Türkmenistandaky wekilhanasynyň işgäri Geldi Myradowyň maşgalasy ýeňiş gazandy, onuň iki gyzy 14 ýaşa çenli çagalar tapgyrynda baýrakly orunlara mynasyp boldular.
Ýaryş tamamlanandan soňra ýeňijileri sylaglamak dabarasy boldy. Türkmenistanyň Küşt federasiýasy guramaçylaryň adyndan hemaýatkärlere we meýletinçilere Hoşallyk güwänamasyny gowşurdy.