Prezident Gurbanguly Berdimuhamedowyň tarapyndan öňe süren Dialog parahatçylygyň kepili başlangyjynyň çäklerinde, Türkmenistanyň BMG-niň Ženewa bölüminiň ýanyndaky Hemişelik wekilhanasy Ženewanyň Halkara barlaglary we ösüş boýunça ýokary institutynda Türkmenistanyň 2022-nji ýylda we geljek döwürde daşary syýasatynda ileri tutýan ugurlaryna bagyşlap brifing geçirdi.
Brifinge Ženewada akkreditirlenen diplomatik edaralaryň hem-de halkara guramalarynyň wekilhanalarynyň ýolbaşçylary we wekilleri gatnaşdylar.
Brifingiň barşynda 2021-nji Halkara parahatçylyk we ynanyşmak ýylynyň jemlerine, şonuň ýaly-da sebit hem-de halkara hyzmatdaşlygynyň giňeldilmeginde möhüm tapgyr bolan Türkmenistanda geçirilen iri halkara çärelerine aýratyn ähmiýet berildi.
Türkmenistanyň Dialog parahatçylygyň kepili atly ählumumy başlangyjynyň ilerledilmegi halkara bileleşiginiň dünýä halklarynyň parahatçylykda we ynanyşmakda ýaşamaklarynyň dessurlarynyň pugtalandyrylmagy, gymmatlyk kesgitlemeleriniň, parahatçylykly dünýägaraýyşlaryň gaýtadan dikeldilmegi, halkara gatnaşyklarynda parahatçylyk hem-de ynanyşmak medeniýetiniň hemmetaraplaýyn kesgitlenilmegi ugrundaky tagallalarynyň utgaşdyrylmagyna gönükdirilendir.
Brifinge gatnaşyjylar şeýle-de Türkmenistanyň Prezidentiniň BMG-niň Baş Assambleýasynyň 76-njy sessiýasynda eden çykyşynyň barşynda öňe sürlen Türkmenistanyň ileri tutýan ugurlary bilen hem tanyş boldular.
Çäräniň ahyrynda BMG-niň Baş Sekretarynyň orunbasary, BMG-niň Ýewropa ykdysady komissiýasynyň Ýerine ýetiriji sekretary hanym O.Algaýerowa hem-de Intellektual eýeçiliginiň Bütindünýä guramasynyň (IEBG) öňki Baş sekretary jenap Frensis Garrä Türkmenistanyň Bitaraplygynyň 25 ýyllygyna atly ýubileý medallaryň gowşurylyş dabarasy geçirildi.